INAP

Segunda feira, 11/05/2026, Diretór Jeral Institutu Nasional Administrasaun Públika (INAP) realiza enkontru ho Komissáriu Komisaun Funsaun Públika (KFP) Sr. José Telo Soares Cristóvão no Diretór Ezekutivu Fundu Desenvolvimentu Kapital Umano (FDCH) Sr. Júlio Aparício.

Objetivu enkontru ne'e hodi hare fila fali mekanizmu no prosedimentu programa bolsa estudu ba funsionárius públiku iha Timor-Leste. Diskusaun ne’e mós foka atu identifika problema sira ne’ebé durante ne’e hasoru iha prosesu implementasaun no buka solusaun ne’ebé apropriadu atu hadi’a prosesu refere.
Parte sira diskute kona ba mekanizmu kandidatura, kritériu seleksaun, área prioritária ba estudu, no monitorizasaun ba benefisiáriu bolsa estudu sira. Objetivu husi enkontru ne’e mak atu garante katak programa bolsa estudu sei implementa ho mekanizmu ne’ebé klaru, transparente, no tuir prosedimentu ne’ebé vigora.

Enkontru ne’e remata ho kompromisu husi INAP, CFP no FDCH atu kontinua hametin koordenasaun no aperfeisoa mekanizmu programa bolsa estudu atu bele fó benefísiu máximu ba dezenvolvimentu kapasidade funsionárius públiku iha Timor-Leste. Fatin realizasaun enkontru ne'e salaun enkontru DG iha INAP.

Sesta feira 08/05/2026, Diretór Jerál Instituto Nacional da Administração Pública (INAP) partisipa iha serimónia enseramentu Formasaun Espesializada ba Funsionáriu Finansas Instituto de Petróleo e Geologia (IPTL), ne’ebé realiza iha Salaun Block 13 INAP, iha loron 8 fulan Maiu tinan 2026.
Formasaun ne’e hala’o durante semana ida, hahu husi loron 4 to’o 8 fulan Maiu 2026, ho partisipasaun ema nain 14 hosi IPTL. Objetivu principal hosi formasaun ne’e mak atu hasa’e kapasidade téknika partisipante sira iha área jestaun finansas no komprensaun kona-ba prosedementus legais relasiona ho orsamentu no ezekusaun finanseira tuir regras Administrasaun Públika.

Iha nia intervensaun, Diretór Jerál INAP enfatiza katak valór hosi formasaun ida ne’e la’ós de’it iha koñesimentu ne’ebé hetan durante sesaun, maibé iha kapasidade formandu sira atu aplika no adapta aprendizajen refere iha servisu loron-loron. Nia mos husu ba partisipante sira atu kontinua aprende, pratika, no ajusta an ba mudansa tempu no dezenvolvimentu sira iha área jestaun finansas públika.
Aleinde ne’e, Diretór Jerál INAP reafirma komitmentu INAP atu kontinua servisu hamutuk ho IPTL iha futuru, liuhosi realizasaun formasaun no atividade sira seluk ne’ebé bele fortalece kapasidade rekursus umanus iha instituisaun refere.
Iha oportunidade hanesan, Vise Prezidenti IPTL hato’o nia apresiasaun ba INAP tanba organiza formasaun ida ne’e no reafirma katak matéria sira ne’ebé aborda durante formasaun foka liu ba prosedementus legais no mekanizmu orsamentál, ne’ebé importante tebes atu garante jestaun finansas ne’ebé transparente, efisiente no tuir lei ne'ebe vigora iha Timor-Leste.

Kinta feira 07/05/2026, Diretór Jeral Institutu Nasionál Administrasaun Públika (INAP), partisipa iha Enkontru Datoluk Komisaun Organizadora ba Preparasaun Selebrasaun Loron Restaurasaun Independénsia, 20 de Maio 2026, ne’ebé realiza iha Salaun Enkontru VIP Ministériu Administrasaun Estatal (MAE), iha loron 7 fulan Maiu 2026.

Enkontru ida ne’e lidera husi komisaun organizadora ho objetivu atu halo revizaun no diskute progresu preparasaun ba atividade komemorativa Loron Restaurasaun Independénsia. Iha enkontru refere, kada seksaun ka subkomisaun hato’o relatóriu kona-ba servisu sira ne’ebé prepara ona no atividade sira ne’ebé sei kontinua hala’o to’o loron eventu.

Asuntu sira ne’ebé hetan atensaun mak inklui preparasaun protokolu, seguransa, lojístika, dekorasaun, programa serimónia, mobilizasaun partisipantes no koordenasaun entre instituisaun governamentál sira ne’ebé envolve iha atividade refere.

Iha oportunidade ne’e, DG INAP hatudu apoiu tomak husi INAP ba komisaun organizadora no reafirma prontidaun instituisaun atu kontribui tuir responsabilidade ne’ebé atribui ona, atu asegura selebrasaun Loron Restaurasaun Independénsia tinan ida ne’e bele realiza ho di’ak, ordeiru no susesu.

Kuarta feira 06/05/2026, Formasaun jestaun eskritoriu ba funsionárius administrasaun apoiu suku iha Postu Administrativu Tilomar, Munisipiu Covalima durante loron lima hahu husi loron segunda dia 4 to'o sesta feira dia 8 fulan Maiu 2026. Abertura formasaun ne'e husi Administrador Postu Tilomar no akompaña husi Diretór DNFQPAP Luis Amaral no mos formador INAP.

Objetivu husi formasaun ne'e atu hasa'e kuñesementu, abilidade no hadia komportamentu funsionárius sira nia hodi hadi'ak liu tan atendementu ba komunidade sira iha suku hat mak ne'ebe mak partense ba Postu Tilomar. Materia formasaun ne'ebe hato'o husi INAP hamutuk materia hitu, mak hanesan : Hakerek Dokumentus, Sistema Administrasaun Públika, Komunikasaun no koordenasaun, Jetaun tempu no jestaub ba an-rasik, Jestaun enkontru, Atendementu Públika no Jetaun arkivu.

Kada suku iha reprezentante funsionárius nain 4 ho total partisipante hamutuk ema nain 16. kompostu husi feto 10 no mane 6. formasaun ne'e hala'o iha Salaun Postu Tilomar, Covalima. Fromasaun ida ne'e ho loron no tipu ne'ebe hanesan hala'o mos iha Postu Adminstrativu Balibo, Munisipiu Bobonaro.

Segunda feira, 04/05/2026, Diretór Jeral INAP partisipa iha serimónia abertura Formasaun Espesializada ba kargu estrutura Instituto Profisional no Treinamentu Laboral (IPTL), ne’ebé realiza iha salaun Block 13, INAP.
Iha intervensaun abertura, Diretór Jeral hato’o katak formasaun espesializada ida-ne’e iha importánsia estratéjika atu hasa’e kapasidade lideransa no jestaun ba kargu estrutura sira, hodi garante implementasaun politika públika ho efisiénsia no efikasia. Nia mos enfatiza katak dezenvolvimentu rekursu umanu iha setór públiku tenke kontinua sai prioridade, tanba sira mak pilar prinsipal ba servisu públiku ne’ebé di’ak no responsivu ba nesesidade komunidade.

Aleinde ne’e, Diretór Jeral hato’o apresiasaun ba partisipasaun ativa husi formandu sira no encoraja atu aproveita oportunidade formasaun ne’e ho máximu, liu-liu iha aspetu aplikasaun prátika iha fatin servisu. Nia mos reafirma kompromisu INAP atu kontinua fornese formasaun relevante no bazeia ba nesesidade real instituisaun públika sira.

Serimónia abertura ne’e marka hahú atividade formasaun ne’ebé sei fó kontribuisaun importante ba fortalese kapasidade institusionál IPTL no hasa’e kualidade prestasaun servisu públiku iha Timor-Leste. Partisipante ne'ebe partisipa iha formasain ne'e ema nain 13, kompostu husi mane 10 no feto 3 no formasaun loron 5 nia laran, hahu husi loron 4 to'o 8 fulan Maiu 2026.

Tersa feira 28/04/2026, Aprezentasaun Rezultadu Servisus Asesor Jurídiku INAP ne’ebé realiza iha Salaun Block 13 INAP hetan partisipasaun ativu husi estrutura lideransa no kargu diresaun sira iha INAP. Atividade ida-ne’e fó oportunidade atu partilha rezultadu servisu jurídiku ne’ebé halo ona, inklui análize legal, rekomendasaun estratéjika, no kontribuisaun ba fortalecimento sistema administrativu no regulamentu internu institusaun nian.

Iha eventu refere, Diretór Jeral INAP mos fó intervensaun hodi hatudu apresiasaun ba esforsu no kontribuisaun Asesor Jurídiku, no mos fó korajen ba ekipa atu kontinua hadia qualidade servisu, garante konformidade legal, no apoia prosesu reforma administrasaun públika. Intervensaun Diretór Jeral sublinha importánsia papel jurídiku iha sustenta tomada desizaun institusionál ne’ebé sólidu, transparente no akontável.

Kinta feira, 30/04/2026, Diretór Jeral INAP partisipa iha reuniaun ho Dirijentes Autoridades Municipais, inklui Autoridade Administrativa Atauro, la’ós deit fó orientasaun kona-ba Avaliasaun Kondisaun Mínima (AKM), maibé mos liga diretamente ba papel estratéjiku INAP iha asisténsia téknika no dezenvolvimentu formasaun ba funsionáriu públiku sira. Iha kontestu ida-ne’e, Diretór Jeral enfatiza katak rezultadu husi AKM tenke utiliza hanesan baze atu identifika lakuna kapasidade iha nivel munisipál, ne’ebé sei orienta dezenhu programa formasaun ne’ebé relevante no responde ba nesesidade real iha terrenu.

INAP, liu husi nia papel hanesan instituisaun formadora Estadu nian, sei fó asisténsia téknika ba Autoridades Municipais hodi dezenvolve no implementa planu formasaun ne’ebé fó prioridade ba área sira ne’ebé presiza hadia, inklui jestaun administrativu, planeamentu, no prestasaun servisu públiku. Nune’e, ligasaun entre AKM no programa formasaun sai nu’udar instrumentu importante atu asegura katak intervensaun kapasidade lao ho efisiénsia, bazeia ba evidénsia, no kontribui diretamente ba fortalecimento institusionál no melhoria kontinu iha governasaun lokal. atividade ne'e realiza iha Salaun Delta Nova, Comoro Dili-

Kuarta dia 22 – Sexta 24 Abril 2026, Loron Segundu Atividade outbound formasaun lideransa obrigatoriu ba kargu diretór nasional ka ekiparadu faze primeiru tinan 2026.

Kuarta dia 22 – Sexta 24 Abril 2026, Loron primeiru Atividade outbound formasaun lideransa obrigatoriu ba kargu diretór nasional ka ekiparadu faze primeiru tinan 2026.
Atividade outbound iha programa formasaun lideransa obrigatóriu INAP mak komponente importante ida ne’ebé integra iha kalendáriu ofisiál formasaun, ho objetivu atu hametin kapasidade lideransa liuhusi aprendizajen prátiku no esperiensial.
Iha programa ne’e, outbound realiza durante loron 3 hahu husi 22-24 Abril 2026 hodi fó oportunidade ba partisipante sira atu sai husi ambiente sala aula no envolve diretamente iha atividade iha terrenu. Metodolojia ne’e permite formandus sira aprende liuhusi experiénsia real, ne’ebé foka ba:
• Fortalesimentu lideransa prátika
• Traballu iha ekipa no kolaborasaun
• Komunikasaun efetiva
• Resolusaun problema no tomada desizaun
• Reziliénsia no adaptasaun iha situasaun desafiante

Atividade outbound sira normalment inklui dinâmika grupu, simulasaun dezafiu, jogu lideransa, no exercísiu kooperasaun ne’ebé presiza planeamentu, koordinasaun no konfiansa entre membru sira. Liuhusi atividade hirak ne’e, partisipante sira bele komprende diak liu ninia papel hanesan lider, no oinsá atu jere ekipa iha situasaun real iha servisu públiku.
Implementasaun outbound tuir kalendáriu formasaun INAP nian hatudu katak instituisaun ne’e la deit foka ba teoria, maibé mós garante katak lider sira hetan kapasidade prátika ne’ebé relevante ho dezafiu sira iha administrasaun públika Timor-Leste.
Atividade ne’e realiza iha Otel Nagarjo Munisipiu Baucau.

Sexta feira 24/04/2026, Enseramentu Formasaun Lideransa Obrigatóriu ba Kargu Diretór Nasional ka ekiparadu – Faze Primeiru tinan 2026 realiza ho susesu, marka etapa importante ida iha esforçu dezenvolvimentu kapasidade lideransa iha administrasaun públika Timor-Leste nian.

Programa ida-ne’e dura loron 14, ne’ebé kompostu husi loron 10 ba palestra, matéria iha aulas inklui loron 3 ba atividade outbound. Tópiku materia iha aulas mak hanesan hanesan lideransa, jestaun estratéjiku, komunikasaun organizasionál no tomada desizaun. Tuir mai, loron 3 dedikadu ba atividade outbound, ho objetivu atu fortalesé kapasidade kolaborasaun, lideransa prátika no reziliénsia iha ambiente real.

Formasaun ida-ne’e dirije ba Diretores Nasionais no Ekiparadu sira husi instituisaun oioin, inklui UNTL, TR, MCAE, SEFOPE, MJDAC, INDIMO, MTA, MF, MACLN, MNEC no MAPPF. Total partisipante hamutuk ema 23, ne’ebé kompostu husi feto 9 no mane 14, ne’ebé hotu-hotu konsege kompleta prosesu formasaun ho diak.

Serimónia enseramentu realiza iha Salaun Nagarjo, Vila Antiga Baucau, iha Sexta-feira, 24 Abril 2026, ensera atividade ne’e husi Komisária KFP – Asuntu Regime Espesial no akompaña husi Diretór Jeral INAP no reprezentante PAM Baucau, ne’ebé hatudu apoiu institusionál no koordenasaun entre entidade relevante sira iha área formasaun no dezenvolvimentu funsionáriu públiku.

Kinta feira, 16 Abril 2026. Diretór Jeral INAP, Policarpo Amilcar Boavida, S.Pd, akompaña Ministru MAE, Tomás do Rosário Cabral hodi simu S.E. Primeiru-Ministru, Kay Rala Xanana Gusmão, hodi hala'o kedas diskusaun urjente hamutuk ho ekipa servisu tekníku husi Ministeriu Administrasaun Estatál nian, kona-bá estrutura definitivu Rejiaun Administrativa Espesiál Oecusse Ambeno (RAEOA).

Reuniaun entre S.E. Primeru Ministru ho Ministeriu Administrasaun Estatal, nudar komitmentu Governu Konstitusionál da-Sia nian hodi tau prioridade ba estrutura RAEOA nian hodi halo nomeiasaun ba dirijente sira, hodi apresenta iha reuniaun konsellu ministru iha tempu badak. Tamba Oras ne’e daudaun, diretores rejionais ne’ebé hala’o funsaun tranzisaun labele liu loron 40, no nomeasaun iha estrutura definitivu sei prienxe hosi Oecusse oan sira.

Diskusaun Xefe Governu ho Ministru Administrasaun Estatál ne'e, atu aselera prosesu tekníkas sira hanesan, nomeia no fó pose bá estrutura definitivu RAEOA nian atu funsionamentu administrasaun no ezekusaun Orsamentu Jerál Estadu (OJE) bele la’o ho di’ak.