Haklaken.com

Loron Mundiál ba Liberdade Imprensa, PM Taur Kontente ho JTL

Dili, (03 Maiu 2022), Haklaken.com_Primeiru-Ministru (PM), Taur Matan Ruak kontente no hato'o k'solok Loron Internasionál ba Liberdade Imprensa nian ne'ebé monu iha 03 Maiu.

Iha felisitasaun ne'e, PM Taur kongratula ba jornalista hothotu, espesial ba Jornalista timoroan ne'ebé namkari iha Timor laran tomak.

"Sente kontente ho serbisu Jornalista sira-nian iha Timor-Leste, ne'ebé divulga informasaun sira ba ita-nia komunidade ho responsabilidade no tuir duni kode étika jornalista sira-nian, embora hasoru difikuldades tanba sei falta tebes rekursu umanu," dehan PM Taur relasiona ho loron Mundiál ba Liberdade Imprensa ne'ebé jornalista Timoroan mós selebra, Tersa (03/05).

Xefe governu ne'e salienta, nu'udar governu, liuhusi Ministériu Asuntu Parlamentár no Komunikasaun Sosiál (MAPKomS) no Sekretáriu Estadu Komunikasaun Sosiál (SEComS) no organizasaun media sira-nian, governu hakarak kontinua hasa'e kapasidade Jornalista sira-nian iha area jurnalizmu.

"insentiva instituisaun média sira atu iha kbiit hodi kontirbui di'ak liután ba ita-nia prosesu konstrusaun Estadu no demokrásia iha rai laran liuhusi informasaun, tanba média nu'udar pilar importante ida mós," dehan Xefe Governu ne'e.

PM ne'e konvida ema hotu espesialmente ba jornalista sira katak, "mai ita hamutuk hodi luta nafatin ba prezerva bem-estar povu nian liuhusi serbisu Jornalista sira-nian ne'ebé sempre sai lalenok ba ema hotu," katak Taur. #