Usman Rajput

غریبِ شہر کے لوگ

اس وقت ملک کا آدھے سے زیادہ حصہ سیلاب ، بارش، لینڈ سلائیڈنگ اور قدرتی آفات کی وجہ سے مکمل طور پر ڈوبا ہوا ہے اور اب تک سینکڑوں لوگ جن میں مرد، عورتیں اور بچے شامل ہیں اس آفت کی زد میں موت کے منہ میں جا چکے ہیں ۔ انسانی لاشیں پانی پہ بے قدر و منزلت ایسے تیرتی پھر رہی ہیں جیسے زمین پر کیڑے مکوڑے ہوتے ہیں جنہیں بِنا دیکھے پاؤں تلے روند دیا جاتا ہے ۔
لوگوں کے پاس کھانے کے لیے ایک نوالہ تک نہیں ، پینے کے لئے صاف پانی ملنا نایاب ہے لیکن ڈوبنے کے لئے ، قیمتی زندگیاں نگلنے کے لئے پانی کی لہریں ہمہ وقت تیار ہیں ۔
لوگ بیچارے اللہ پر توکل کے بعد اپنی مدد آپ کے تحت خود کو محفوظ مقامات پر منتقل کرنے میں ایک دوسرے کی مدد کر رہے ہیں۔
قدرتی آفات پر تو انسان کا بس نہیں چلتا لیکن صد افسوس کہ ہمارے ملک کا میڈیا اس وقت ایسے خاموش تماشائی بنا ہوا ہے جیسے ملک میں آفت نہیں بلکہ رحمت نازل ہوئی ہے ۔
ریاست تو ماں جیسی ہوتی ہے جس کے لئے تمام اولاد برابر ہوتی ہے مگر یہاں پر معاملہ بالکل الٹ ہے ، جب ریاست کو پتہ چلتا ہے کہ سیلاب میں مرنے والے بلوچ ، سندھی، سرائیکی یا گلگت کے لوگ ہیں تو ریاست کہتی ہے کہ دو چار ہزار لوگ مر رہے ہیں نا تو خیر ہے مرنے دو، ہماری بادشاہت تو قائم ہے نا، ہمارا بینک بیلنس تو بن رہا ہے ، ہماری اولاد ، رشتے دار ، نوکر ، چاکر اور کتے بلیاں تو محفوظ مقامات پر ہیں ۔
میڈیا کی بے غیرتی کا اندازہ اس بات سے لگایا جا سکتا ہے کہ ان کے نزدیک مریم نواز کو ٹویوٹا کمپنی نے کس برینڈ کا کونسا بیگ گفٹ دیا ہے، یہ خبر باقاعدہ ہیڈ لائنز میں شامل کیا جاتا ہے ، فردوس عاشق اعوان کو ایئرپورٹ پر روک لیا جانا ہیڈ لائنز کا حصہ ہے ، پارٹی گرل کی وائرل ویڈیو ، فیروز خان کا غصہ، شہباز گل کی بیماری ، بلاول بھٹو کے دورے، یہ سب کچھ تمام الیکٹرانک ، پرنٹ اور سوشل میڈیا پر دکھایا جا رہا ہے لیکن کسی ایک چینل نے بھی غیرت کا مظاہرہ کر کے سیلاب متاثرین کی خبر کو ہیڈ لائنز کا حصہ نہیں بنایا کیونکہ اس خبر پر کوئی ریٹنگ تھوڑی ملنی تھی۔
سیلاب کے پانی میں بہتے ہوئے معصوم بچوں کی لاشیں ہمارے منہ پر ایک تماچہ ہیں ، پانی میں بہتی سینکڑوں لاشیں چیخ چیخ کر خدا کی طرف دیکھتے ہوئے ایک ہی سوال پوچھ رہی ہیں کہ خداوندا کیا یہ ملک ہمارا نہیں ہے ؟ کیا ہم انسان نہیں ہیں ؟. Usman Rajput