B.S.F KIU Gilgit

پریس ریلیز
تاریخ: 13 جون 2025
جاری کردہ: بلتستان اسٹوڈنٹ فیڈریشن (بی ایس ایف) گلگت زون

آج دانیور چوک گلگت میں ایک تاریخ ساز لمحہ اس وقت رقم ہوا جب گلگت کی باشعور، باہمت اور غیرت مند خواتین نے اپنے اسیر بھائیوں کی رہائی اور عوامی ایکشن کمیٹی کے گرفتار کارکنان سے اظہارِ یکجہتی کے لیے احتجاجی مظاہرہ کیا۔ ان خواتین نے ثابت کر دیا کہ جب ظلم و جبر اپنی انتہا کو پہنچتا ہے، تو سب سے توانا آواز ایک ماں، بہن اور بیٹی کی ہوتی ہے، جو صرف اپنے خاندان نہیں بلکہ پوری قوم کی غیرت و حمیت کی ترجمان ہوتی ہے۔

بلتستان اسٹوڈنٹ فیڈریشن گلگت زون ان انقلابی خواتین کے جذبے کو سلام پیش کرتی ہے جنہوں نے آج ریاستی جبر کے خلاف ڈٹ کر آواز بلند کی۔ بی ایس ایف گلگت کے صدر شیباز شریف اور کابینہ کے دیگر اراکین نے احتجاج میں شرکت کر کے اپنی یکجہتی کا اظہار کیا اور واضح پیغام دیا کہ نوجوان، طلبہ اور خواتین اب خاموش نہیں رہیں گے۔

یہ احتجاج نہ صرف سیاسی قیدیوں کی رہائی کی پکار تھا بلکہ ایک بیدار معاشرے کی علامت بھی تھا۔ کامریڈ بابا جان کی جانب سے ان باشعور خواتین کو پیش کیا گیا خراجِ تحسین اس بات کا ثبوت ہے کہ سچائی، بہادری اور حوصلے کی آوازیں کبھی دبائی نہیں جا سکتیں۔

بی ایس ایف گلگت، ان تمام مظلوموں کے ساتھ کھڑی ہے جو ناانصافی، جھوٹے مقدمات اور سیاسی انتقام کا شکار ہو رہے ہیں۔ ہم اس عزم کا اعادہ کرتے ہیں کہ گلگت بلتستان کے عوام کے آئینی، انسانی اور سیاسی حقوق کی جدوجہد ہر حال میں جاری رہے گی۔ ہم اس بات پر یقین رکھتے ہیں کہ تبدیلی ہمیشہ عوام کے شعور اور قربانیوں سے جنم لیتی ہے اور آج کا احتجاج اسی روشن مستقبل کی طرف ایک قدم ہے۔

بلتستان اسٹوڈنٹ فیڈریشن ہر اس آواز کے ساتھ ہے جو سچ کے لیے بلند ہو، چاہے وہ آواز کسی ماں کی دعا میں ہو، کسی بہن کی پکار میں یا کسی بیٹی کی آنکھ کے آنسو میں۔