Thinbone Gyi

ဗျည်းအားလုံးသင်ပြီးတဲ့အခါ ဗျည်းတလုံးချင်းနဲ့ အဓိပ္ပါယ် ရှိတဲ့ စာလုံး​တွေကို ​ရွေးထုတ်ပြီး ခုလိုပုံ​လေး​တွေနဲ့ ရှင်းပြပါတယ်။ ပြီး​တော့ ပြည်ပက က​လေး​တွေ သင်တဲ့အခါမှာ (အထူးသဖြင့် ယူ​ကေ) ဝ ကို fat လို့ ​ပြောပြီးသင်လို့မရပါဘူး။ သူတို့​ကျောင်း​တွေမှာ fat စကားလုံးက body shaming မို့ မသုံးဖို့ တားမြစ်ထားတယ်လို့ ​မေ​မေတ​ယောက် ​ပြောပြပါတယ်။ ဒါ​ကြောင့်မို့ fat အစား chubby လို့ ​ပြောင်းသုံးရတယ်။
​​နောက်တချက်က ဝ ဆိုရင် ခန္ဓာကိုယ် ဝ တာအပြင် ထမင်း ဝ တာတို့ တံခါးဝ တို့ စသဖြင့်လည်း ရှိ​သေးတာမို့ သင်ရင်းနဲ့ ​ပြောသွားရတယ်။ အဲဒီစာလုံး​တွေကို က​လေး​တွေ နားလည်​အောင် ပုံမှာပြထားသလို ယှဥ်တွဲရှင်းပြ​ပါတယ်။
ဗျည်းတလုံးပြီး​တော့ တလုံးထက်ပိုတဲ့ ဗျည်း​တွေ​ပေါ့။

အဲဒီလိုသင်ရင်းနဲ့ တဖြည်းဖြည်း ဖတ်တတ်လာတာပါပဲ။
သင်​ပေးသူ သင်ယူသူ နှစ်ဦးနှစ်ဖက် စိတ်ရှည်ဖို့​တော့လိုတာ​ပေါ့။ 🥰
***
MND
#မြန်မာစာ

ကကြီး ခခွေး အမည်မှန်
+++++
ပြည်ပမှာ မွေးဖွား ကြီးပြင်းပြီး များသောအားဖြင့် မြန်မာလို ပြောလေ့မရှိတဲ့ ပတ်ဝန်းကျင်မှာ နေထိုင်ကြတဲ့ ကလေးတွေကို မြန်မာစာသင်တဲ့အခါ ကကြီး ခခွေး ဗျည်းတွေရဲ့ အမည်မှန်နဲ့ အသံထွက်ကို ကွဲပြားအောင် သေသေချာချာ ပြောပြရပါတယ်။ ဉပမာ - အမည်က "ကကြီး" အသံထွက်က "က" စသဖြင့်ပါ။ အမည်မှန်ကို စသင်ကတည်းက သေချာသိပါမှ ကြီးအထိ မှန်သွားမှာမို့ ကကြီး ခခွေး အမည်မှန်သိဖို့က အရေးကြီးပါတယ်။ ဓအုပ်ခြိုက်တို့ ဗလက်ခြိုက်တို့ ဆိုပြီးအသက်ကြီးတဲ့အထိ စွဲသွားမှာ စိုးလို့ပါ။
ဒါကတော့ အရင်က ပါစင်နယ်အကောင့်မှာ တင်ဖူးတဲ့ စာနဲ့ ကဗျာလေးပါ။ ဖတ်ကြည့်ကြပါဦးနော်။
ကလေးတွေကို ကကြီး ခခွေး သင်မယ်ဆိုရင် ဘာကြောင့် ကကြီးလို့ ခေါ်ရတယ်၊ ဘာကြောင့် ခခွေးလို့ ခေါ်ရတယ်ဆိုတာကို မိဘ သို့မဟုတ် ဆရာတွေက ဒီကဗျာလေးတွေနဲ့ အရင် မိတ်ဆက် ပြောပြပေးနိုင်ပါတယ်။ ဒါမှ ကကြီး ခခွေး အမည်တွေဟာ အကြောင်းမဲ့ ပေးထားတာ မဟုတ်ကြောင်း ကလေးတွေ သဘောပေါက် နားလည် သွားကြမှာ ဖြစ်ပါတယ်။ ပြည်ပက ကလေးတွေ အနေနဲ့တော့ ဒီကဗျာလေးဟာ ခက်ကောင်း ခက်နိုင်ပေမဲ့ နားလည်နိုင်တဲ့ အသက်အပိုင်းအခြား ရှိတဲ့ ကျောင်းသားတွေအတွက်တော့ အဆင်ပြေပါလိမ့်မယ်။

ကကြီး ခခွေး ကဗျာ
===
ရှေ့ဆောင်ဦးစီး ကိုကကြီး
ခွေခွေလေးကွေး မယ်ခခွေး
ခခွေးနောက်ဝယ် မဂငယ်
ဂငယ်အပြီး ဦးဃကြီး
ဃကြီးနောက်က င။
လုံးတုံးလုံးတုံး ကိုစလုံး
မုန့်ကြိုးအလိမ် မဆလိမ်
အောက်အနားခွဲ မောင်ဇကွဲ
စ-ကိုမျဉ်းဆွဲ ဈမျဉ်းဆွဲ
ဈမျဉ်းဆွဲနောက်က ည။
သန်လျင်းမှာ ချိတ် ဋသန်လျင်းချိတ်
ဂတ်ဂတ်ဝမ်းဘဲ ဌဝမ်းဘဲ
ရင်ကလေးကောက် ဍရင်ကောက်
ရေခပ်ဖို့ထုတ် ဎရေမှုတ်
နငယ်ထက်ကြီး ဦးဏကြီး
ခဏခဏညည်း။
ဝမ်းဗိုက်ပူပူ တဝမ်းပူ
ဆင်ခတ်တဲ့ထူး ထဆင်ထူး
နှမမယ်ထွေး မယ်ဒထွေး
အောက်ကလေးခြိုက် ဓအောက်ခြိုက်
သေးသေးငယ်ငယ် မောင်နငယ်
နာရီလေးနဲ့ကွယ်။
ခွက်လိုစောက်စောက် ကိုပစောက်
ခေါင်းစောင်းဦးထုပ် ဖဦးထုပ်
အထက်ကခြိုက် ဗထက်ခြိုက်
ခါးလေးကုန်းကုန်း ဘိုးဘကုန်း
ရင်တမမ မမယ်မ
မမ သိပ်ကိုလှ။
အိပ်ရင်ပက်လက် ယပက်လက်
အမြီးကောက်ကောက် မောင်ရကောက်
မိုးပေါ်မှာဗျ ဖိုးရွှေလ
ဝလုံးလေးလို ပြည့်လို့ဝ
အားလုံး တသသ။
ရွှင်ရွှင်ပျပျ ရယ်ဟဟ
လထက်အကြီး ဦးဠကြီး
နောက်ဆုံးမှာဗျ ကိုရွှေအ
ကျီးတွေ တအအ။
က မှ အ ထိ ရွတ်ပါမယ်
မမေ့ကြနဲ့ကွယ်
ဘာကြောင့်ရယ် ခေါ်တာလဲ
မှတ်ကြပါ အမြဲ။
***
မေဓာဝီ

28 Aug 2024