Burmese Defense
Share
07/09/2024
သင်္ခရာဇာ ရေးသားတဲ့
လကျာ်ဘီလူး စာအုပ်မှ ကူးယူဖော်ပြသည်။
"အနောက်သို့ လားခဲ့သည် ရှိသော်"
လူတစ်ရပ်ခန့် ကျောက်တုံးကြီးကို
လျော့ရဲရဲ မှီလှဲရင်း လက်ပိုက်ထားဆဲသူမှာ တစ်ယောက်တည်း။
အရေးလွန်ဘွဲ့ရ ငကံကောင်း ဖြစ်သည်။
အခြားဘွဲ့များ ရရှိခဲ့သော်လည်း
အလောင်းမင်းကြီး ပထမဆုံး ချီးမြှင့်ခဲ့သည့်
အရေးလွန်အမည်ကိုသာ မြတ်နိုးသည့်နည်းတူ ပထမဆုံး သိခဲ့ရသော
တပ်မှူးတစ်ဦးအပေါ် ယခုအချိန်ထိ
ယုံကြည်လေးစားဆဲသူလည်း ဖြစ်သည်။
"တပ်မှူးနဲ့ဆုံတုန်း မေးမယ် မေးမယ်နဲ့
မမေးဖြစ်တာလေး သတိရသဗျာ"
"ဒီလိုပါ တစ်ခါတလေ တပ်မှူး မချဉ်းနိုင်လို့
ဆုတ်ရတာတွေ ရှိတယ်။ ဘဝရှင်က မဆုတ်မနစ် ကြိုးပြီးတိုက်လို့ မိန့်တော်မူထားတဲ့ကြားက ဘယ်လိုအင်အားနဲ့များ ရဲရဲဆုတ်သွားနိုင်တာလဲ "
"ကျုပ်ပြောတာ မှားသွားရင် တောင်းပန်ပါရဲ့
တိုက်ရတုန်းက အသက်ကို ဂရုမထား တိုက်နေပြီးမှ ဘာကြောင့် နောက်လှည့်ဖို့ ဆုံးဖြတ်ခဲ့သလဲ
တကယ်ဆိုရင် တစ်ယောက်ကျန်သည်အထိ
တိုက်မယ်လို့ ခံယူထားပြီးသား မဟုတ်လား"
လကျာ်ဘီလူးက ပြန်ဖြေတယ်။
"ဒါကတော့ တိုက်ရင် တိုက်ရဲသလို ဆုတ်လည်း ဆုတ်ရဲရမှာပေါ့ ကံကောင်း"
"ဘယ်လို.. ဘာကြောင့် ဆုတ်ရဲရမှာလဲ"
"မင်းရော တစ်ကြိမ်မှ ပြန်မဆုတ်ရဖူးဘူးလား"
"ဆုတ်ဖူးပါတယ်
ဆုတ်ရချိန်မှာ မခံချိမခံသာနဲ့
ပြေးဝင်သေလိုက်တာမှ
ကောင်းလိမ့်ဦးမယ် ဆိုပြီး
ဝမ်းနည်း အရှက်ရတယ်ဗျာ
အမိန့်ကြောင့်သာ ဆုတ်ခွာရပေမယ့်
ကိုယ့်ဘာသာတောင် စိတ်ပျက်မိခဲ့တယ်"
"မင်းဟာ အရှေ့ကို သွားဖို့ပဲ
အားသန်နေတယ် ဒါပေမယ့်
မင်းမှာ အနောက်ဘက်ဆီ လားကိုလားရမယ့်
အကြောင်းကိစ္စရှိလာခဲ့ပြီ ဆိုပါတော့
စိတ်ပျက်မနေနဲ့။ အားယုတ်မနေနဲ့။ ရဲရဲဆုတ်လိုက်"
"အနောက်ကို လှမ်းလိုက်ရလို့ ရှေ့သွားနေတဲ့ ခြေလှမ်းတွေ ရပ်တန့်သွားတာ
မှန်တယ်။
ကိုယ့်နေရာကနေ အနောက်ကို ပြန်ရောက်သွားတာ မှန်တယ်။
မဆုတ်မဖြစ်လို့ ဆုတ်ရတာဟာ ဆုံးရှုံးမှုတွေ ရှိရင်တောင်မှ ရှုံးနိမ့်သွားတာတော့ မဟုတ်ဘူး"
"တချို့ ကာလတွေမှာ မှားမှန်းမသိ
ရှေ့ဆက်တိုးမိနေတာတွေ ရှိတာပဲ
နောက်ဆုတ်ချိန်မှ အမှားတွေကို
ဆင်ခြင် မြင်မိတတ်တာ
ဆက်လျှောက်နေရင် ခေါင်းပေါ်ကျမယ့်
ငှက်ချေး ရပ်လိုက်လို့ မစွန်းတော့သလိုပဲ
ငါတို့ဟာ ကိုယ့်သေတွင်းကိုယ်
တူးနေမိတာ ဆိုရင်လည်း
နောက်ဆုတ်လိုက်တဲ့အတွက်
ကျင်းကို ပြန်မြင်မိတတ်တယ်"
"ဒါ့ကြောင့် ရဲရဲဆုတ်ပါ
နောက်ဆုတ်လိုက်ရတာဟာ
အရှုံးချည်း မဟုတ်ပါဘူး
ခုန်အုပ်ဖို့ အားယူတာလည်း ဖြစ်တယ်
သုံးသပ်ဖို့ အချိန်ယူတာလည်း ဖြစ်တယ်
နောက်တစ်ကြိမ်အတွက် ပြင်ဆင်ဖို့
သင်ခန်းစာလည်း ယူနိုင်တယ်"
"ရှုံးနိမ့်ရမှာကို မကြောက်နဲ့
ရှုံးနိမ့်မှုအပေါ် တုန်လှုပ်နေရင်လည်း အပိုပဲ
ငါ တစ်ကြိမ် မှားခဲ့ပြီ၊ ဘာ လွဲချော်ခဲ့သလဲ၊ ဘယ်လိုလုပ်ရမလဲ ဆိုတဲ့ အဖြေကိုပဲ ရှာ"
"လူတွေဟာ ပင်ပန်းဆင်းရဲမှုတွေကြောင့်
သန်မာလာကြတယ်
ရှုံးနိမ့်မှုတွေကြောင့် ကိုယ့်ကိုယ်ကိုယ် သိလာတယ် အမှားတွေကနေ သင်ခန်းစာ ရတယ်
ဒါတွေဟာ အနောက်ကို လားရာကနေ တစ်ဖန်အားယူနိုင်တဲ့ အကြောင်းတရားတွေပဲ"
"ဒါ့ကြောင့် ဆင်းရဲမှာကိုလည်း မကြောက်နဲ့
ခံနိုင်ရည် ရှိလာတယ်လို့ သဘောထား
ဆုတ်ရရင်လည်း မစိုးရိမ်နဲ့
ဆုံးကြရမယ့်ဘေးက လွတ်လာတယ်လို့ နှလုံးထား
မင်းမှာ စိတ်ခွန်အားသာ ရှိနေရင်
ကျောက်တောင်ကြီးလည်း
လိုဏ်ခေါင်းဖြစ်နိုင်တယ်
ပြန်လာတဲ့အခါမှာသာ လက်နက်တစ်ခုခု ပါပါစေ"
ထိုအခါ သွေးသောက်တစ်ဦးက
"ဟုတ်တယ် ကိုရင်
ကျုပ်တို့ တပ်ဆုတ်တယ် ဆိုတာ
မရနိုင်သေးလို့ ခဏဆုတ်ထားတာ
လက်လျှော့ အရှုံးပေးသွားတာ
ထွက်ပြေးသွားကြတာမျိုး မရှိဘူး
ကျုပ်တို့ဟာ မြန်မာတွေပီပီ
မြန်မြန်နဲ့ မာမာ တုံ့ပြန်လာဦးမှာပဲ
ဒါကို သဘောပေါက်ထားရင် ရဲရဲဆုတ်ဝံ့တယ်
အချည်းနှီးဖြစ်မှာ မြင်လို့
ဆုတ်ရတာပဲလို့ သိတယ်
ငါတို့ဗိုလ်တွေ နိုင်အောင်
ပြန်တိုက်ကြဦးမယ်ဆိုတာ ယုံကြည်ထားပြီးသား"
အရေးလွန် အားတက်သွားသည်။
"ဒီလိုဆိုတော့ ရှက်စရာ မဟုတ်တော့သလိုပ"
ဟု ရှက်ရယ်ရယ်လိုက်၏ ။
အခြားသူများကလည်း ပြုံးလျက်။
"တကယ်ရှက်ရမှာက မနိုင်တော့ပါဘူး ဆိုပြီး အရှုံးပေးသွားရတာရယ်
သူရဲဘောကြောင်ပြီး ထွက်ပြေးသွားကြတာရယ်
အဲဒါမျိုးကို ရှက်တတ်စမ်းပါ"
"ဟိတ်.....
မနိုင်တာကြီးကို အတင်းဝင်တိုက်ပြီး သေရတာလည်း ရှက်ဖွယ်ပဲကွ
ရာဇဝင်ရေး ညံ့ရပြီကိုး"
"ငါတို့သာ တကယ်ရှက်ရရင်
ရှက်စရာတွေမှ အများကြီး"
လက်ျာဘီလူး အပိတ်စကားဆိုလျက်
ထရပ် နှုတ်ဆက်လိုက်ပြီး ထွက်သွားလေတော့၏ ။
#သင်္ခရာဇာ
Click here to claim your Sponsored Listing.
