Myanmar Dominicans

ကမ္ဘာ့ငြိမ်းချမ်းရေးအတွက် စိပ်ပုတီးစိပ်၍ ဆုတောင်းခြင်းကို ပုပ်ရဟန်းမင်းကြီးဦးဆောင်

ကမ္ဘာ့နေရာအနှံ့အပြားတွင် စစ်ပွဲများဖြစ်ပေါ်လာနေမှုကြောင့် အန္တရာယ်ကြီးကျရောက်နေသော "ကမ္ဘာကြီး" ငြိမ်းချမ်းရေး ရရှိရန် အထူးရည်ရွယ်၍ ပုပ်ရဟန်းမင်းကြီးဖရန်စစ်က စိပ်ပုတီးစိပ်၍ ဆုတောင်းခြင်းကို ရောမမြို့ရှိ စိန့်မေရီမေဂျာဘာစီလီကာကြီးတွင် ယနေ့ညနေ၊ စိပ်ပုတီး၏သခင်မပွဲနေ့ အကြိုအဖြစ် ဦးဆောင် ဆုတောင်းခဲ့ပါတယ်။

မနက်ဖြန် အောက်တိုဘာလ ၇ ရက်နေ့၊ စိပ်ပုတီး၏သခင်မ ပွဲတော်နေ့ကိုလည်း "ကမ္ဘာ့ငြိမ်းချမ်းရေး"အတွက် အစာရှောင်၊ ခြိုးခြံဆုတောင်းကြဖို့ တစ်ကမ္ဘာလုံးကို တိုက်တွန်းနှိုးဆော်ထားပါတယ်။

အမုန်းတရားတွေကို တောက်လောင်စေသူတို့၏ နှလုံးသားများကို ပြောင်းလဲစေပါ။ သေကြေပျက်စီးခြင်းတွေကို ဖြစ်ပေါ်စေသော လက်နက်များ၏အသံဆိုးများကို ချုပ်ငြိမ်းစေပါ။ လူတွေရဲ့နှလုံးသားကို နာကြည်းစေသော အကြမ်းဖက်မှုတို့ အဆုံးသတ်ပါစေ။ တိုင်းနိုင်ငံများကို အုပ်ချုပ်နေကြသော ခေါင်းဆောင်များ၏ လုပ်ဆောင်ချက်များ၌ ငြိမ်းချမ်းရေးအတွက် လုပ်ဆောင်နိုင်ရန် လှုံ့ဆော်ပေးပါစေ။" ဟု ပုပ်ရဟန်းမင်းကြီးက ဆုတောင်းပေးပါတယ်။

ပုပ်ရဟန်းမင်းကြီးနှင့်အတူ ကမ္ဘာ့နိုင်ငံအသီးသီးမှ ကာဒီနယ်ကြီးများ၊ ဆရာတော်ကြီးများနှင့် ဘုန်းတော်ကြီးများ၊ သူတော်စင်များနှင့် လူများစွာတို့ ပါဝင် စိပ်ပုတီးစိပ် ဆုတောင်းခဲ့ကြပါတယ်။

"မတရားမှုနှင့် စစ်ပွဲများအကြား အခက်ခဲမျိုးစုံနှင့် အတိဒုက္ခရောက်နေသူတို့အတွက် ဆုတောင်းပေးပါတယ်" ဟု ဆုတောင်းပေးခဲ့ပါတယ်။

ဒိုမီနီကန်ကိုယ်တော်

ပုံ - Vatican News

အရက်သောက်ခြင်းနှင့် မူးယစ်ခြင်း

တစ်ခါက ဘုန်းကြီးကို “အရက်သောက်တာ အပြစ်လား” လို့ အမေးခံရဖူးပါတယ်။ ဘုန်းကြီးလည်း လွှတ်ကနဲဆိုသလို “အရက်သောက်တာ အပြစ်မဟုတ်ဘူး။ မသောက်တတ်ဘဲ သောက်တာက အပြစ်” လို့ချက်ချင်းဖြေပေးမိခဲ့တယ်။

ဟုတ်ပါတယ်။ ကက်သလစ်အသင်းတော်ရဲ့ သွန်သင်ချက်မှာ အရက်သောက်ခြင်းကို ပင်ကိုယ်အပြစ်တစ်ခုအဖြစ် မသတ်မှတ်ထားပါဘူး။ သို့ပေမယ့်လည်း မူးယစ်ခြင်းကိုတော့ အပြစ်ဖြစ်ကြောင်း ရှင်းရှင်းလင်းလင်း သွန်သင်ထားပါတယ်။ ပြောရမယ်ဆိုရင်တော့ “တန်ဆေး လွန်ဘေး” ဖြစ်ပြီး အပြစ်ထဲသို့ ကျရောက်စေတယ်လို့ သွန်သင်ထားခြင်းပါ။ အထက်က ဘုန်းကြီးစကားနဲ့ ပြန်ပြောရရင်တော့ သောက်တတ်ရင် အပြစ်မဖြစ်ဘဲ မသောက်တတ်ဘဲ မူးအောင်သောက်ရင် အပြစ်ဖြစ်စေပါတယ်။

ပြသနာက မူးယစ်ခြင်းပါ။ မူးယစ်ခြင်းဟာ အပြစ်ပါ။

အရက်စသောက်တဲ့အချိန် ဘာပြသနာမှ မဖြစ်ပါ။ ဖြစ်ဖို့ အကြောင်းတရားလည်း မတွေ့မိပါ။ သိုပေမယ့်လည်း အရက်သောက်ခြင်းမှ မူးလာချိန်မှာတော့ ပြသနာများ စတင်ပါတယ်။ အဲဒီလို မူးယစ်ခြင်းရဲ့ ပြသနာတွေကို ကျနော်တို့ရဲ့ ဘုရားကျောင်းဝန်းတွေထဲမှာ မြင်တွေ့နေရတာ တကယ့်ကို စိတ်မကောင်းစရာပါပဲ။ ဘုန်းတော်ကြီး ယခင်တာဝန်ယူခဲ့သည့် ဘုရားကျောင်းဝန်းအပါအဝင် သာသနာတော်တော်များများမှာ ဒီမူးယစ်ခြင်း ပြသနာတွေ ရှိနေတာဟာ သွန်သင်မှုအားနည်းခြင်း၊ လေ့လာမှု အားနည်းခြင်း နှင့် ဘုရားကျောင်းဝန်းကို အလွဲသုံးစားလုပ်ခြင်းတစ်ခုလို့ ရှုမြင်မိပါတယ်။ ဘုရားကျောင်းပုရဝုဏ်နှင့် မူးယစ်ခြင်းဟာ လုံးဝ (လုံးဝ) မအပ်စပ်တဲ့အရာတစ်ခုပါပဲ။

အရက်သောက်ခြင်းနှင့် မူးယစ်ခြင်းကို ခွဲခြားနားလည်နိုင်မယ်ဆိုရင်တော့ “အရက်သောက်တာ အပြစ်လား” ဆိုတဲ့ မေးခွန်းရဲ့အဖြေကို သင်ကိုယ်တိုင် နားလည်ပါလိမ့်မယ်။

ရောမဩဝါဒ စာစောင် (၁၄း၂၁)မှာတော့ သံပေါလူးက ယခုလို သွန်သင်ထားပါတယ်။ “သူတစ်ပါးအား အပြစ်သို့ ကျရောက်စေမည်ဆိုပါက စပျစ်ရည်သောက်ခြင်းမှ စ၍ မည်သည့် အပြုအမူကိုမဆို မပြုလုပ်လျှင် မှန်ကန်သင့်မြတ်ပေ၏။”

ဒိုမီနီကန်ကိုယ်တော်

တရားဟောသူတော်စင်များအသင်းဂိုဏ်းတည်ထောင်သူ စိန့်ဒေါမိနစ်

နှစ်စဉ်ဩဂုတ်လ ၈ ရက်နေ့ကို စိန့်ဒေါမိနစ်အား အောက်မေ့သတိရဖွယ်နေ့အဖြစ် အသင်းတော်ကြီး၏ ဝတ်ပြုကိုးကွယ်ရာ ပြကထိန်တွင် ပြဌာန်းကျင်းပကြသည်။

စိန့်ဒေါမိနစ်အကြောင်း ပြောကြရာတွင် သူ၏ဆုတောင်းခြင်းအားကြီးပုံကို ပို၍ ပြောဆိုတတ်ကြသည်။ အပြစ်သားများခွင့်လွှတ်ခြင်းရဖို့၊ ပြောင်းလဲခြင်းရှိဖို့ နေ့နေ့ညည အမြဲဆုတောင်းတတ်သူ ဖြစ်သည်။ “သူသည် ဘုရားသခင်နှင့်စကားပြော၍ ဘုရားသခင်အကြောင်းကိုသာ ပြောချင်သူ” ဖြစ်သည်ဟု သူ၏အသင်းဂိုဏ်းဝင် ဘုန်းတော်ကြီးများနှင့် ကိုရင်များက ပြောဆိုလေ့ရှိကြသည်။

ပုပ်ရဟန်းမင်းကြီးစိန့်ဂျွန်ပေါလ် (၂)က “ဘုရားသခင်နှင့်စကားပြော၍ ဘုရားသခင်အကြောင်းကိုသာပြောသည်“ ဟူသော စိန့်ဒေါမိနစ်၏စိတ်ထားကို အင်မတန်သဘောကျကြောင်း ပြောဆိုလေ့ရှိသည်။ ဒိုမီနီကန် အသင်းဂိုဏ်းဝင်များနှင့် တွေ့ဆုံသော အခမ်းအနားတစ်ခုတွင် အရှင်သူမြတ်ကြီးက “စိန့်ဒေါမိနစ်လို ဘုရားသခင်အား တွေ့ကြုံခံစားရသောသူသည်သာ ဘုရားသခင်အကြောင်းကို ပြောဆိုနိုင်လိမ့်မည်“ ဟု မှတ်ချက်ပြုခဲ့သည်။ ဆိုလိုသည်မှာ စိန့်ဒေါမိနစ်ကဲ့သို့ ဘုရားသခင်နှင့်စကားပြောသူ၊ ဆုတောင်းခြင်းပြုသူသာ ဘုရားသခင်အကြောင်းကို ဟောပြောနိုင်မည် ဖြစ်သည်။

ပုပ်ရဟန်းမင်းကြီး ဘက်နက်ဒစ် (၁၆)ကလည်း စိန့်ဒေါမိနစ်ကို “ဆုတောင်းခြင်းအားကြီးသော ပုဂ္ဂိုလ်“ ဟု ၎င်း၏ မြတ်သောအယူဝါဒ သွန်ခြင်းမိန့်ခွန်းမှာ မှတ်ချက်ပြုခဲ့သည်။ “စိန့်ဒေါမိနစ်သည် ဝိညာဉ်များ ကယ်တင်ခြင်းရဖို့အတွက်၊ အထူးသဖြင့် သူ့ခေတ်သူ့ကာလအတွင်း အယူဝါဒလွဲမှားခြင်းသို့ ကျရောက်နေသော ဝိညာဉ်များ ပြောင်းလဲခြင်းနှင့် ကယ်တင်ခြင်းရဖို့အတွက် ဝိညာဉ်တော်ဘုရား၏လမ်းညွှန်မှုနှင့် ခရစ်တော်၏ချစ်ခြင်းမေတ္တာတို့ဖြင့် မဆုတ်မနစ် ကြိုးစား သာသနာပြုခဲ့သည်။ ဧဝံဂေလိသစ္စာသုံးပါးဖြစ်သော နာခံခြင်း၊ ဆင်းရဲခြင်းနှင့် ဖြူစင်ခြင်း သစ္စာတို့ကို ပူးတွဲကျင့်ကြံရင်း ခရစ်ယာန်ဘဝအသက်တာ၏ ပြည့်စုံခြင်းကို လျှောက်လှမ်းခဲ့သည်။ ထိုကဲ့သို့ လျှောက်လှမ်းသော ခြေလှမ်းတိုင်းတွင် ဆုတောင်းမေတ္တာသည် ခွန်အားဖြစ်၍ အသီးအပွင့်တွေ ပေးခဲ့သည်”ဟု အရှင်သူမြတ်ကြီးက မိန့်ဆိုခဲ့သည်။

ဒိုမီနီကန်ကိုယ်တော်