Charmya Study Japanese Language Learning Center

ယခုလို ငလျင်ဒဏ်သင့် ဒေသများကို စေတနာ့ဝန်ထမ်းအဖြစ် သွားရောက်ကူညီတော့မယ်ဆိုရင် ဆောင်ရန် ရှောင်ရန်အဖြစ် သတိထားသင့်တဲ့ အချက်လေးတွေကို NHK World က ဖော်ပြပေးထားတဲ့အတိုင်းပြန်လည်မျှဝေပေးလိုက်ပါတယ်

🔸 ပထမဦးဆုံးအနေနဲ့

-အစွန်းအထင်း အညစ်အပေခံနိုင်ပြီး ခန္ဓာကိုယ်ကို လွတ်လပ်စွာ လှုပ်ရှားနိုင်တဲ့ ချောင်ချိတဲ့ အဝတ်အစားမျိုးကို ဝတ်ဆင်သင့်ပါတယ်။

-ခရမ်းလွန်ရောင်ခြည် နေအပူဒဏ်ကိုကာကွယ်ဖို့ လက်ရှည်၊ ဘောင်းဘီရှည်နဲ့ ဦးထုပ်တွေကို ဝတ်ဆင်ဖို့ တိုက်တွန်းလိုပါတယ်။(ဖြစ်နိုင်ရင် လုပ်ငန်းခွင်သုံး အမာစားဦးထုပ်၊ အလုပ်ကြမ်းသုံးလက်အိတ်၊ ရာဘာလက်အိတ်တွေ ဝတ်ဆင်သွားသင့်ပါတယ်)

-ချွေးသုတ်ဖို့ မျက်နှာသုတ်ပုဝါတွေလည်း ပါဖို့လိုအပ်ပါတယ်။

-သံတိုသံစ ဒါမှမဟုတ် မှန်ကွဲစတွေကို တက်နင်းမိပြီး ထိခိုက်ဒဏ်ရာရတာကနေ ကာကွယ်ဖို့ ခိုင်ခံ့ထူထဲတဲ့ဖိနပ်ကို ဝတ်ဆင်ပြီး ကိုယ့်ခြေထောက်ကို ဂရုစိုက်ကာကွယ်သင့်ပါတယ်။(ဆောက်လုပ်ရေးအလုပ်သမားတွေသုံးတဲ့ ဘွတ်ဖိနပ်တွေရှိရင် ဝတ်ဆင်သွားသင့်ပါတယ်)

🔸စေတနာ့ဝန်ထမ်းအလုပ်တွေကို ပါဝင်လုပ်ဆောင်တဲ့အခါ သယ်ဆောင်သွားသင့်တဲ့ ပစ္စည်းတွေကတော့

-ပထမဆုံး ကိုယ်တိုင်စားဖို့အတွက် အစားအစာနဲ့ ရေကို လုံလောက်အောင် ပြင်ဆင်ယူဆောင်သွားပါ။ နွေရာသီအချိန်တွင်းမှာဆိုရင် ရေကိုပိုပိုသာသာ ယူသွားဖို့လိုပါတယ်။ အလွယ်တကူ မပုပ်သိုးသွားနိုင်တဲ့ အစားအစာတွေကိုလည်း ယူဆောင်သွားပါ။ အထူးသဖြင့် ကိုယ်လုပ်ဆောင်ရမယ့် တာဝန်က ချွေးထွက်များစေမယ့် အလုပ်မျိုးဆိုရင် ဆားဓာတ် အလုံအလောက်ရှိဖို့ ဆားဓာတ်ပါတဲ့ သကြားလုံး၊ဆားငံစေ့၊ ဓာတ်ဆားရည်ကိုလည်း ပါအောင် ယူသွားဖို့ ဂရုစိုက်သင့်ပါတယ်။

-မျက်နှာသုတ်ပုဝါတွေ အရမ်းညစ်ပတ်လာတဲ့အခါ သုံးနိုင်အောင် တစ်ရှူးတွေ၊ ပိုးသတ်ဆေးပါတဲ့ wet tissue တွေကို ယူသွားတာ ကောင်းပါတယ်။

-မိုးရွာတဲ့အခါမျိုးအတွက် အပေါ်အင်္ကျီနဲ့အောက်ကဘောင်းဘီ သပ်သပ်စီ ရှိတဲ့ မိုးကာ အဝတ်အစားကိုလည်း ယူဆောင်သင့်ပါတယ်။ ကော်တိပ်၊ ကတ်ကြေးနဲ့ marker pen တွေကိုဆောင်ထားတာက ကိုယ်ပိုင်အနေနဲ့သုံးချင်တဲ့အချိန်သုံးလို့ရတာကြောင့် ပို‌ကောင်းပါတယ်။

🔸နောက်ထပ် သိထားရမယ့် သတိထားစရာ အချက်တချို့ကတော့

-သဘာဝဘေးအန္တရာယ်အတွင်း ကယ်ဆယ်ရေးလုပ်ငန်းတွေမှာ စေတနာ့ဝန်ထမ်းလုပ်တဲ့အခါ ဘေးသင့်ရပ်ရွာဒေသကိုသွားတဲ့အခါ ဒေသခံတွေအတွက် ကိုယ်က ဝန်ထုပ်ဝန်ပိုး မဖြစ်အောင် နေတတ်ဖို့ အရေးကြီးပါတယ်။

-ကိုယ်သွားရောက် လုပ်အားပေးမယ့် နေရာဒေသရဲ့အခြေအနေနဲ့ ပတ်သက်ပြီး ကြိုပြီး အပြည့်အဝ သိထားအောင်လေ့လာပြီး ဘေးကင်းလုံခြုံမယ့် သယ်ယူပို့ဆောင်ရေး နည်းလမ်းနဲ့သွားဖို့ တိုက်တွန်းလိုပါတယ်။

-လုပ်အားပေးတဲ့အလုပ်ကို စလုပ်တာနဲ့ ကိုယ့်ကျန်းမာရေးကို ကိုယ်တိုင်ဂရုစိုက်ရမှာဖြစ်ပါတယ်။ အပူမလျှပ်အောင်နဲ့အန္တရာယ်မရှိအောင် အခြေအနေ ကြည့်ပြီး သတိနဲ့ အလုပ်လုပ်ရပါမယ်။ မကြာခဏ အနားယူပါ။ နေမကောင်းဘူးလို့ ခံစားရတယ်ရင် ကူညီလုပ်ကိုင်နေတာကိုနားလိုက်သင့်ပါတယ်။

-ကိုယ့်အတွက်အလွန်ခက်ခဲတာ ဒါမှမဟုတ် အန္တရာယ်များမယ်လို့ ယူဆရတဲ့အလုပ်တွေဆိုရင် တက်ကျွမ်းနားလည်သူများနဲ့ သေချာ တိုင်ပင်ဆွေးနွေးပြီး ထိခိုက်ဒဏ်ရာမဖြစ်အောင် ‌ရှောင်ရှားသင့်ပါတယ်။

-ဘေးသင့်ခံရတဲ့နေရာဒေသတွေမှာ စေတနာ့ဝန်ထမ်းအလုပ်ကို လုပ်တဲ့အခါ စိတ်ထိခိုက်စရာမြင်ကွင်းတွေကို မြင်တွေ့ရနိုင်တာကြောင့် စိတ်ဖိစီးမှုတွေလည်း ခံစားရနိုင်ပါတယ်။ ဒါကြောင့် စေတနာ့ဝန်ထမ်းအလုပ်တွေ လုပ်ပြီးရင် စိတ်ပိုင်းရော ရုပ်ပိုင်းဆိုင်ရာပါ ကောင်းကောင်းအနားယူဖို့ တိုက်တွန်းလိုပါတယ်။

Crd to NHK World

Source : https://www3.nhk.or.jp/nhkworld/my/multilingual_links/disaster/3510/