May author

The Midnight Under The Moon
(လနတ်သမီးနှင့်အမှောင်မိစ္ဆာသခင်)

Chapter 15

အမှောင်သခင်အားထုရိုက်ရင်းတင်းကြပ်စွာပွေ့ဖက်ခံနေရသောလနတ်သမီး၏ဖြစ်ရပ်ကို အစားအသောက်လာပို့သောနျန့်နျန့်မှာ မြင်ပြီး အကြမ်းဖက်ခံရသည်ဟုအထင်လွဲသွားကာ လနတ်သမီးအားဖက်ထားသော အမှောင်သခင်၏လက်တို့ကို အားဖြင့်ဖယ်လိုက်သဖြင့် အမှောင်သခင်မှာ အိပ်ရာပေါ်သို့ ပြန်လဲကျသွားလေသည်။ နှုတ်မှလည်း လနတ်သမီးမှာ အသက်ပင်ပဓာနမထားဘဲ ကယ်ပေးသည့်ကျေးဇူးအား ယခုကဲ့သို့တုံ့ပြန်ရကြောင်းပြောလိုက်လေသည်။ ထိုသို့သောစကားပြောနေစဉ် လနတ်သမီးမှာ နျန့်နျန့်အား ဆက်၍မပြောရန်တားလိုက်ပြီး အမှောင်သခင်အား ပြန်လည်ကျန်းမာရန်ကိုသာဦးစားပေးရန်ပြောပြီး နှုတ်ဆက်ကာ အခန်းထဲမှထွက်လာခဲ့လိုက်သည်။ နျန့်နျန့်သည် အမှောင်သခင်အား မကျေနပ်သောအကြည့်တို့ဖြင့်ကြည့်ပြီး လနတ်သမီးအနောက်သို့ ပြေး၍လိုက်သွားလေသည်။ နျန့်နျန့်ပြောသွားသောစကားကို အမှောင်သခင်မှာ နားမလည်ဘဲရှိနေပြီး ကြီးမားသောအမှောင်စွမ်းအားဒဏ်ခံနေရသောသူ၏ခန္ဓာကိုယ်မှာ အတွင်းအားအားနည်းနေခြင်းမှလွဲပြီး တစ်စုံတစ်ရာမှမခံစားရသောကြောင့် ထူးဆန်းနေသည်။ ထိုစဉ် အခန်းထဲသို့ အထိန်းတော်ကြီးဝင်ရောက်လာပြီး အမှောင်သခင်အတွက် အတွင်းအားပြန်လည်ညှိဆေးဖော်ကာ လာရောက်ပေးလေသည်။ သမားတော်ပုံစံမပြောင်းဘဲ မူလသရုပ်မှန်အတိုင်းဝင်လာသော အထိန်းတော်ကြီးအားကြည့်ရင်း အမှောင်သခင်မှာ အရာအားလုံးကိုနားမလည်နိုင်ဘဲ ရှုပ်ထွေးနေလေတော့သည်။ အထိန်းတော်ကြီးမှာ သူမယူလာသောဆေးကိုသောက်စေပြီး အမှောင်သခင်မေ့မြောနေသည်မှာ (၁)ပတ်ကျော်ခန့်ကြာခဲ့ပြီး အဖြစ်မှန်များစွာကိုလည်း လနတ်သမီးမှာ သိရှိသွားပြီဖြစ်သည်ဟုပြောကာ စကားအစချီလိုက်လေသည်။

လွန်ခဲ့သော(၁)ပတ်ခန့်– အမှောင်သခင် လနတ်သမီးအားကယ်တင်ပြီး လဲကျသွားပြီးနောက် သူမတို့နေထိုင်ရာ သမားတော်ကြီး(အထိန်းတော်ကြီး)အိမ်သို့ ခေါ်ဆောင်လာခဲ့ကြလေသည်။ ထိုစဉ် သမားတော်ပုံစံပြောင်း
နေသော အထိန်းတော်ကြီး၏သရုပ်မှန်အတိုင်းတွေ့သွားကြပြီး လနတ်သမီးနှင့်နျန့်နျန့်တို့မှာ လန့်သွားကြလေသည်။ နျန့်နျန့်မှာ သူမဆောင်ထားသောဓားမြှောင်အားထုတ်ကာ အထိန်းတော်ကြီးလည်ပင်းသို့ထောက်လိုက်ပြီး အမှန်အတိုင်းဝန်ခံရန် ပြောလေသည်။ အထိန်းတော်ကြီးမှာ သူမသည်မကောင်းတဲ့စိတ်မရှိကြောင်းဖြစ်ကြောင်းကုန်စင်ပြောပြရန်ပြင်နေစဉ် မေ့မြောနေသောအမှောင်သခင်မှာ မည်းနက်သောမျက်လုံးအစုံတို့နှင့်အတူ အေးစက်စွာနိုးထလာပြီး ဘေးနားရှိလနတ်သမီးအား အန္တရာယ်ပြုလေသည်။ လနတ်သမီးမှာ မူမမှန်သောအမှောင်သခင်၏ပုံစံ
ကိုသတိထားမိပြီး စည်းချပ်ဂါထာရွတ်ကာ အမှောင်သခင်အား မန္တန်စက်ဝန်းဖြင့် ချုပ်ထားလိုက်လေသည်။ အမှောင်သခင်၏ယင်ယန်ဓာတ်များမှာ မျှတစွာကျင့်ကြံထားသည့်အားလျော်စွာ အမှောင်စွမ်းအားတို့သည် တစ်သားတည်းပေါင်းစည်းပြီး အမှောင်သခင်၏ဝိညာဉ်အား ဝါးမြိုနေကြလေသည်။ လနတ်သမီးမှာ ထိုဖြစ်စဉ်ကိုမြင်ပြီး အမှောင်သခင်ကို အမှောင်တိုင်းပြည်မှလူဖြစ်မှန်းသိသွားကာ အထိန်းတော်ကြီးအား အမှန်တိုင်းပြောရန် မေးလိုက်သည်။ အထိန်းတော်ကြီးလည်း အားမုမှာ အမှောင်သခင်စုန့်မုလိန်ဖြစ်ကြောင်း ပြောပြလိုက်လေသည်။ လနတ်သမီးနှင့်နျန့်နျန့်မှာ ထိုစကားကိုကြားပြီးသူမတို့ဖြေရှင်းနှိမ်နင်းရမည့် အမှောင်တိုင်းပြည်‌သခင်မှာ တစ်လျှောက်လုံးတွင် သူမတို့အနားတွင်ရှိနေသည့်အဖြစ်ကိုတွေးမိသွားကာ လန့်သွားကြလေသည်။

လန့်ပြီးတွေဝေနေသောလနတ်သမီးအား နျန့်နျန့်မှာ ယခုအချိန်သည် သူမတို့၏ကောင်းကင်နတ်မင်းကြီးပေးထားသောတာဝန်ကိုလုပ်ဆောင်ရန် အကောင်းဆုံးအခြေအနေဖြစ်သောကြောင့် အမှောင်သခင်အား အမြန်ဖမ်းဆီး
ရန် တိုက်တွန်းလိုက်လေသည်။ လနတ်သမီးလည်း မိစ္ဆာဖမ်းမျှော်စင်ကို စွမ်းအားဖြင့်ထုတ်ကာ အမှောင်သခင်အား စိုက်ကြည့်နေမိသည်။ အားမုမှာ ဆုံခဲ့ရသည့်ကာလတစ်လျှောက် သူမတို့အား အကြိမ်ကြိမ်ကယ်တင်ပေးသည်ကိုမြင်ယောင်ပြီး သူမသတင်းကြားထားသကဲ့သို့ သုံးလောကကိုဒုက္ခပေးနေသည့် အမှောင်သခင်ဖြစ်နေသည်ကို မယုံနိုင်ကာ တွေဝေလျက်ရှိနေသည်။ အမှောင်သခင်အား အသက်နှုတ်ယူရန်ပြင်နေသော လနတ်သမီးတို့အား အထိန်းတော်ကြီးမှ ဒူးထောက်ကာဦးညွတ်ရင်း အသက်ချမ်းသာခွင့်ပေးရန်တောင်းပန်ပြီး အမှောင်သခင်၏ ဖြစ်ရပ်မှန်အကြောင်းစုံကို ပြောပြလိုက်လေသည််။ ဖြစ်ကြောင်းကုန်စင်နားထောင်ရသည့်ညတာမှာ ခရီးရှည်ကြာဖြတ်ခဲ့ရသကဲ့သို့ပင် သန်းခေါင်ယံအချိန်သို့ ရောက်ရှိလာခဲ့လေသည်။ အမှောင်သခင်၏ ဖြစ်ကြောင်းကုန်စင်ကိုကြားသိရပြီးနောက် လနတ်သမီးသည် အခြေအနေကိုပြန်လည်သုံးသပ်ပြီးလျှင် သူမတို့အန္တရာယ်ကြုံတွေ့တိုင်းကယ်တင်ပေးသည့်သူမှာ အမှောင်သခင်ဖြစ်ပြီး အလင်းအမှောင်စွမ်းအားသည် အမှောင်သခင်အားတိုက်ခိုက်ခြင်းကိုမြင်ယောင်ကာ အရာအားလုံးမှာ အမှောင်သခင်နှင့်ဆက်စပ်နေသော်လည်း နောက်ကွယ်မှချုပ်ကိုင်နေမည့် အင်အားကြီးမားသောတစ်စုံတစ်ရာရှိနေမည်ဟု စဉ်းစားမိလေသည်။ ကောင်းကင်ယံမှ တိမ်ကင်းစင်ကာသာနေသောလမှာ ရုတ်တရက်ဆိုသလိုပင် တိမ်မည်းတို့ဖုံးလွှမ်းသွားပြီး ကောင်းကင်တစ်ခုလုံးမှောင်မိုက်သွားလေသည်။ ထိုစဉ် မန္တန်အစည်းအဝိုင်းထဲရှိအမှောင်သခင်မှာ ထိန်းချုပ်မှုကင်းမဲ့သကဲ့သို့ပြင်းထန်လာပြီး စည်းချပ်ဂါထာအား ချိုးဖျက်လိုက်လေသည်။ လနတ်သမီးသည်သူမ၏အတွင်းအားဖြင့် အမှောင်သခင်အားကုသပေးခဲ့သည်ကိုသတိရပြီး အလျင်အမြန်ဆိုသလိုပင် အမှောင်သခင်အား စိတ်ကိုထိန်းချုပ်နိုင်ပြီး အသိစိတ်ဝင်ရန်အတွက် သန့်စင်သောကျင့်စင်ဖြင့် အတွင်းအားကိုပေးလေသည်။ ခဏအတွင်းမှာပင် အမှောင်သခင်
၏ခန္ဓာကိုယ်မှာ တည်ငြိမ်သွားပြီး ရုတ်တရက်ဆိုသလို လနတ်သမီး၏အတွင်းအားကို ပြင်းထန်စွာစုပ်ယူလိုက်သဖြင့် လနတ်သမီး၏ခန္ဓာကိုယ်မှာ အမှောင်သခင်ဆီသို့ အားဖြင့်ဆွဲခေါ်ခံရသကဲ့သို့နီးကပ်သွားကာ နှုတ်ခမ်းခြင်းဖိပြီးနမ်းမိသွားလေတော့သည်။ နူးညံ့သောနှုတ်ခမ်းသားနှစ်ခုတို့ထိစပ်မှုကြောင့် လနတ်သမီးမှာ စိတ်လှုပ်ရှားသွားပြီး စွမ်းအားများပွင့်ထွက်လာကာ အလင်းဓာတ်များမှာ အမှောင်သခင်အား ဖုံးလွှမ်းသွားလေတော့သည်။ ထိုအခါမှ အမှောင်သခင်လည်း ပြန်လည်တည်ငြိမ်သွားပြီး သတိမေ့ကာ လဲကျသွားလေတော့သည်။ ဆက်လက်ပြီး လနတ်သမီးမှာ ဝိညာဉ်သွေးကြောမှ အတွင်းအားများအားလုံးကိုစုစည်းကာ အမှောင်သခင်အား ထိန်းချုပ်ရန်ကြိုးစားနေသော အမှောင်ဓာတ်များကို ဖယ်ရှားလိုက်လေသည်။ ထိုသို့သောအပြုအမူကို နျန့်နျန့်မှာတားရန်ကြိုးစားသော်လည်း မမှီလိုက်ဘဲရှိကာ လနတ်သမီးမှာ ပြင်းထန်စွာဒဏ်ရာရပြီး သွေးများအန်ကာ လဲကျသွားလေသည်။ နျန့်နျန့်မှာ လနတ်သမီး၏နတ်သက်တမ်းတစ်လျှောက် ကျင့်ကြံလာသောအတွင်းအားတစ်ဝက်ကို သူမတို့၏ရန်သူအပေါ်သုံးပေးလိုက်ခြင်းကို နားမလည်အောင်ဖြစ်ပြီး ငိုကြွေးကာ ပြောလိုက်လေသည်။ အထိန်းတော်ကြီးမှာ လနတ်သမီးအား ဦးချအရိုအသေပေးလိုက်ပြီး သူမအားယုံကြည်ကာ အမှောင်သခင်ကို ကယ်တင်ပေးလိုက်ခြင်းအတွက် ကျေးဇူးတင်ရှိကြောင်းပြောကာ တွဲထူလိုက်ပြီး နျန့်နျန့်နှင့်အတူ အခန်းသို့လိုက်ပို့ကာအနားယူစေသည်။ အထိန်းတော်ကြီးပြောပြသောအကြောင်းအရာကိုနားထောင်ပြီးနောက် အမှောင်သခင်သည် လနတ်သမီးအပေါ်တွင် အပြစ်ရှိစိတ်နှင့်အတူ ကြီးမားသောအသက်တစ်ချောင်းမှာလည်း ကျေးဇူးအကြွေးတင်သွားသဖြင့် လနတ်သမီးအပေါ်ထားသော သူ၏ခံစားချက်မှာ ပိုမိုလေးနက်လာခဲ့လေသည်။

နေရောင်တို့တဖြည်းဖြည်းတက်လာသောနံနက်ခင်းတစ်ခုတွင် မြို့ထဲသို့သွားရာလမ်းနှင့် ရွာငယ်တို့ကြားရှိ စီးဆင်းနေသောချောင်းငယ်ကိုဖြတ်ကာ တည်ရှိနေသောတံတားလေးပေါ်တွင် ရပ်နေသော လနတ်သမီးအနားသို့ အမှောင်သခင်ရောက်ရှိလာလေသည်။ လနတ်သမီးမှာ သူ၏အသက်သခင်ကျေးဇူးရှင်ဖြစ်သည့်အတွက် မည်သို့သောအခြေအနေမှာမဆို လနတ်သမီးအတွက် အသင့်ရှိနေမည်ဟု သစ္စာဆိုကာ ကတိပေးလိုက်လေသည်။ လနတ်သမီးမှာ အမှောင်သခင်အား အဓိပ္ပါယ်များစွာပါသောအကြည့်တို့ဖြင့်ကြည့်လိုက်ရာ နှစ်ဦးသားအကြည့်ချင်းစုံရင်း အချင်းချင်း၏စိတ်ခံစားချက်ကို ထိုးဖောက်သိမြင်ရလောက်အောင် အတော်ကြာစိုက်ကြည့်နေမိကြသည်။ လေပြေညင်းတို့တိုက်ခတ်သံ၊ ချောင်းထဲမှရေစီးဆင်းသံ၊ ကျေးငှက်များအသံတို့မှအပပတ်ဝန်းကျင်မှာ တည်ငြိမ်နေသည်။ စူးစိုက်ကြည့်နေမိသောအကြည့်တို့မှဖယ်သွေရင်း လနတ်သမီးမှာ အမှောင်သခင်၏သရုပ်မှန်ကိုသိရှိပြီးဖြစ်သည့်အလျောက် သူမ၏တာဝန်ကို ပြီးဆုံးအောင်ထမ်းဆောင်ရမည်ဖြစ်သည်ကို ပြောလေသည်။ အမှောင်သခင်သည် သူ၏ဘဝအမှန်ကိုသိပြီးသော်ငြား သုံးလောကအရှုပ်တော်ပုံထပ်မဖြစ်စေရန် အလင်းအမှောင်၏ဇာစ်မြစ်ကိုဖော်ထုတ်ပေးသွားမည်ဟု ပြောလေသည်။ တစ်ဆက်တည်းမှာပင် လနတ်သမီးအား နေရာတစ်ခုသို့ခေါ်သွားချင်ကြောင်းပြောကာ နှစ်ဦးသားထွက်လာကြလေသည်။ သုံးလောကကြားတောင်ခြေရင်းရှိ အရွက်ကလေးများပိုမိုထွက်လာနေသော တတိုင်းမွှေး(ယွိလန်)ပန်းပင်ဆီသို့ ရောက်ရှိလာကြသည်။ လနတ်သမီးမှာသုံးလောကကြားဖြစ်သည့်အလျောက် မြေမညီညာမှုနှင့်အမျိုးမျိုးသောအကြောင်းအရာတို့ကြောင့် မည်သို့သောအပင်မှမရှင်သန်နိုင်သည်ကိုသိထားပြီး ယခုကဲ့သို့ ကြီးမားပြီး သန်မာသောအပင်ကိုတွေ့လိုက်ရသောကြောင့် အံ့ဩနေလေသည်။ အမှောင်သခင်သည် ထိုအပင်မှာ သူနှင့်မိခင်အား ဆက်နွယ်စေသောအကြောင်းကို ပြောပြလိုက်လေသည်။ သွေးသားအရင်းမဟုတ်သော်ငြားသား သွေးသားအရင်းပမာချစ်မြတ်နိုးပေးသောမိခင်အား လနတ်သမီးနှင့်မိတ်ဆက်ပေးချင်သောကြောင့် ခေါ်ဆောင်လာရခြင်းဖြစ်သည်ဟုပြောလိုက်လေသည်။ ထိုစကားကိုကြားပြီး လနတ်သမီးမှာရှက်၍သွားလေသည်။ ထိုစဉ် အကိုင်းအခက်တစ်ခုရှိ သစ်ရွက်များကြားမှ ပန်းပွင့်ရန်အစပျိုးနေသော အဖူးလေးမှာ လှပစွာထွက်ပေါ်၍လာလေတော့သည်။

Author - May
Editor - Ivis

#လနတ်သမီးနှင့်အမှောင်မိစ္ဆာသခင်