S&K Used Laptop Store

E-mail ရေးသားရာမှာ အသုံးပြုလေ့ရှိတဲ့ အတိုကောက်စာလုံးများ
======================================
မနက်ရုံးရောက်လို့ အလုပ်လုပ်ဖို့ ကွန်ပျူတာဖွင့်လိုက်တဲ့အခါ “FYI: Please confirm the date of meeting. Can you LMK it before EOD? ...” အစရှိတဲ့ အတိုကောက်စကားလုံးတွေနဲ့ရေးထားတဲ့ e-mail တွေကို ကိုယ့်ရဲ့အထက်လူကြီးဆီကနေ ဒါမှမဟုတ် လုပ်ဖော်ကိုင်ဖက်တွေကနေ ရဖူးပါလိမ့်မယ်။ အဲဒီအခါမှာ ကိုယ်နဲ့သိပ်မရင်းနှီးတဲ့အတိုကောက်စကားလုံးတွေကို နားလည်အောင်ပြန်လုပ်ရတာက တစ်ခါတလေမှာစိတ်ရှုပ်စရာကောင်းပါတယ်။ နိုင်ငံတကာကုမ္ပဏီအများစုဟာ အင်္ဂလိပ်စာကို နိုင်ငံတကာဘုံဘာသာစကားအဖြစ် အသုံးပြုတဲ့အတွက်ကြောင့် ကိုယ့်ရဲ့အလုပ်လိုအပ်ချက်အရ နိုင်ငံခြားသားတွေနဲ့ဆက်သွယ်ရတဲ့အခါမှာ အင်္ဂလိပ်စကားကိုကောင်းကောင်းအသုံးပြုတတ်ဖို့ လိုပါတယ်။ တကယ်လို့ ကိုယ့်ရဲ့အထက်လူကြီးက နိုင်ငံခြားသားဖြစ်တယ်ဆိုလျှင် သူနဲ့ပြောဆိုဆက်သွယ်နိုင်ဖို့အတွက် ပိုပြီးတော့တောင်အင်္ဂလိပ်စာကို အသုံးပြုရပါလိမ့်မယ်။ အဲဒီလိုဆက်သွယ်ရတဲ့အခါမှာ သူ့နဲ့ပြောဆိုနိုင်ဖို့လည်းအရေးကြီးသလို သူပြောသမျှနဲ့ရေးသမျှအကြောင်းအရာတွေကိုလည်း နားလည်နိုင်ဖို့လိုပါတယ်။
နောက်ပြီး လုပ်ငန်းပိုင်းဆိုင်ရာသတင်းအချက်အလက်တွေကို အချိန်နဲ့တပြေးညီသိရှိစေဖို့ ကုမ္ပဏီအတွင်းမှာ တစ်ယောက်နဲ့တစ်ယောက်ဆက်သွယ်တဲ့အခါမှာလည်း အချိန်တိုတိုအတွင်းမှာလျင်လျင်မြန်မြန်ပေးပို့နိုင်တဲ့ အီးမေးလ်နဲ့ စာတိုပေးပို့စနစ်တွေကို ပိုပြီးအသုံးပြုလာကြပါတယ်။ တကယ်လို့များ ကိုယ့်ရဲ့နိုင်ငံခြားသားအထက်လူကြီးက သူ့ရဲ့မက်ဆေ့ခ်ျတွေနဲ့ အီးမေးတွေထဲမှာ အတိုကောက်စာလုံးတွေကိုထည့်ပြီး သုံးလာခဲ့လျှင် သူပြောချင်တဲ့အကြောင်းအရာတွေကို အပြည့်အဝနားလည်ဖို့ အဲဒီစကားလုံးတွေကိုနားလည်ဖို့လိုပါတယ်။ မဟုတ်လျှင် တချို့အရေးကြီးတဲ့အချက်တွေကို ကျန်ခဲ့နိုင်ပါတယ်။ အဲဒါကြောင့် လုပ်ငန်းခွင်မှာ e-mail နဲ့ပဲဖြစ်ဖြစ် Instant messaging နဲ့ပဲဖြစ်ဖြစ် ဆက်သွယ်ပေးပို့တဲ့အခါ အသုံးများလေ့ရှိတဲ့အင်္ဂလိပ်အတိုကောက်စကားလုံးတွေကို ဗဟုသုတရအောင်ဖော်ပြပေးလိုက်ပါတယ်။
1. ASAP – as soon as possible (ကိုယ့်ရဲ့အထက်လူကြီးဆီကနေ “Send me the report ASAP” ဆိုတဲ့ e-mail ကို ရတယ်ဆိုရင်တော့ သူကကိုယ့်ကို ကျန်တဲ့အလုပ်တွေအကုန်ပစ်ချထားပြီးတော့ အဲဒီအစီရင်ခံစာကို ပြီးအောင်လုပ်တော့လို့ ပြောနေတာပဲဖြစ်ပါတယ်။)
2. BTW – by the way (ဥပမာ - “I read that article BTW. Not so great.” တစ်ခါတလေမှာ back to work လို့လည်း ဆိုလိုပါတယ်။ အဲဒါကြောင့် btw ဆိုတဲ့စကားလုံးကို ဘယ်လိုအသုံးပြုထားသလဲဆိုတာကို ဂရုစိုက်ဖို့လိုပါတယ်။)
3. COB – close of business (လုပ်ငန်းတစ်ခုပြီးစီးဖို့အတွက် သတ်မှတ်ထားတဲ့နောက်ဆုံးအချိန်ကို ဆိုလိုတာဖြစ်ပါတယ်။ ဥပမာ - “This is just a reminder that the survey is still open and will remain open until COB today”)
4. COD – cash on delivery (ပစ္စည်းရောက်မှငွေချေရတဲ့ ငွေပေးချေမှုအမျိုးအစားတစ်ခုဖြစ်ပါတယ်။ ဥပမာ - We don’t have to pay the printer now. It’s COD.”)
5. EOD – end of day (ယေဘုယျအားဖြင့်တော့ အလုပ်အချိန်ရဲ့နောက်ဆုံးအချိန်ကိုပြောချင်တာပါ။ တစ်ခါတလေမှာလည်း နေ့တစ်နေ့ရဲ့နောက်ဆုံး သန်းခေါင်းယံအချိန်ကိုပြောချင်တာပါ။ ကိုယ့်အလုပ်ရှင်က ဘယ်လိုမျိုးသုံးနှုန်းထားသလဲဆိုတာကိုတော့ သိအောင်လုပ်ရပါ့မယ်။ ဥပမာ - “I’d like to submit it before EOD.”)
6. EOM – end of message (အချိန်တိုတိုအတွင်းမှာ မလိုအပ်ဘဲနဲ့ e-mail ဖွင့်ဖတ်ရတဲ့အခက်အခဲတွေကို မဖြစ်စေဖို့ ဒီစကားလုံးကို e-mail ရဲ့အကြောင်းအရာမှာသုံးလေ့ရှိပါတယ်။ ဥပမာ - e-mail မှာဘာမှမရေးဘဲနဲ့ Subject မှာပဲ “Budget meeting 10/11/2019 at 11am (EOM)” ဆိုပြီးသုံးလို့ရပါတယ်။)
7. F2F – face to face (မျက်နှာချင်းဆိုင်တွေ့ဆုံပြီး ပြောချင်တဲ့အခါမှာ သုံးပါတယ်။ ဥပမာ - "Let's meet and work it out F2F.")
8. FAQ – frequently asked question(s) (အကြောင်းအရာတစ်ခုနဲ့ပတ်သက်ပြီး အမေးများတဲ့မေးခွန်းတွေကို ဆိုလိုပါတယ်။ ဥပမာ - “What are the FAQs for our new product?”)
9. FYI – for your information (ဒီစကားလုံးကိုတော့ ရင်းနှီးပြီးသားဖြစ်ပါလိမ့်မယ်။ ကိုယ်မျှဝေပေးပို့လိုက်တဲ့ သတင်းအကြောင်းအရာကို သတိထားမိစေချင်ရင် အဲဒီစကားလုံးကို သုံးနှုန်းပါတယ်။ ဥပမာ - “FYI, this is the update I got from the team.”)
10. F/U – follow up (ကိုယ့်ရဲ့ Client ဆီကို e-mail ပို့ပြီးပြောဆိုဆွေးနွေးထားတဲ့အကြောင်းအရာကို ဖုန်းနဲ့ပဲဖြစ်ဖြစ် လူကိုယ်တိုင်ပဲဖြစ်ဖြစ် ဆက်လက်ဆောင်ရွက်တာကိုပြောတာ ဖြစ်ပါတယ်။ နမူနာစာကြောင်းဆိုရင် “You should f/u your e-mail over phone-call or in person.”)
11. FWD – forward (ကိုယ့်ရဲ့ အထက်လူကြီး ဒါမှမဟုတ် လုပ်ဖော်ကိုင်ဖက်က သူ့ရဲ့e-mail ကို နောက်တစ်ယောက်ဆီ ပေးပို့ပေးစေချင်တဲ့အခါမှာ “Can you FWD my e-mail to # # # as I forgot to loop him/her in the convo?” အဲဒီမှာ Convo ဆိုတာ Conversation ကိုပြောတာပါ။)
12. IOW – in other words (အကြောင်းအရာတစ်ခုကို အရှေ့မှာပြောထားတာထက် ပိုပြီးရှင်းလင်းအောင်ပြောချင်ရင် ဒီစာလုံးနဲ့စပြီးပြောပါတယ်။ ဥပမာ - “The mobile library services have been reorganized – IOW, they visit fewer places.”)
13. LMK – let me know (ကိုယ်ပေးပို့လိုက်တဲ့ e-mail နဲ့ပတ်သက်ပြီး နောက်ဆက်တွဲမေးခွန်းတွေမေးလို့ရအောင် ဖွင့်ပေးတဲ့သဘောနဲ့ အသုံးပါတယ်။ ဥပမာ - “LMK, if you have any questions about this event.”)
14. N/A – not applicable (မေးထားတဲ့မေးခွန်းနဲ့ပတ်သက်ပြီး ကိုက်ညီသင့်တော်တဲ့အဖြေမရှိတဲ့အခါမှာ ဒီစကားလုံးကိုသုံးပါတယ်။ ဥပမာ - “If a question does not apply to you, please put N/A in the box.”)
15. N/B, NB, n/b – nota bene (လက်တင်ဘာသာစကားကနေ ဆင်းသက်လာတာဖြစ်ပြီး အင်္ဂလိပ်လို “Note Well” ကို ဆိုလိုတာဖြစ်ပါတယ်။ ကိုယ်ပေးပို့လိုက်တဲ့အရေးကြီးအချက်အလက်တွေကို စာဖတ်သူသတိထားမိစေဖို့ အဲဒီအချက်အလက်ရဲ့အရှေ့မှာရေးလေ့ရှိပါတယ်။ E.g. “NB Applications received after the closing date will not be accepted.”)
16. NLT – no later than (အကြောင်းအရာတစ်ခုနဲ့ပတ်သက်ပြီး ကိုယ်လိုချင်တဲ့အဖြေ ဒါမှမဟုတ် အစီရင်ခံစာ ဒါမှမဟုတ် အတည်ပြုချက်တွေကို သတ်မှတ်ထားတဲ့အချိန်ထက် နောက်မကျစေဘဲလိုချင်တယ်ဆိုရင် “Please provide feedback NLT EOD Wednesday.”)
17. NRN – no reply necessary (တစ်ခါတလေမှာ မလိုအပ်ဘဲ reply လုပ်တဲ့ e-mail လုပ်တွေကြောင့် ကိုယ့်ရဲ့ Inbox ထဲမှာ e-mail တွေအများကြီးနဲ့မျက်စီရှုပ်နေတတ်ပါတယ်။ တကယ်လို့မြန်း ကိုယ်ပို့လိုက်တဲ့ e-mail ကို reply မလုပ်လည်းရတယ်ဆိုရင် ဒီစကားလုံးကိုသုံးနိုင်ပါတယ်။)
18. RSVP - Répondez s’il vous plait (ပြင်သစ်စကားလုံးတစ်ခု ဖြစ်ပြီး ယေဘုယျပြောရမယ်ဆိုရင် please respond နဲ့အတူတူပဲဖြစ်ပါတယ်။ ဥပမာ - “RSVP to me by April 20th.”)
19. TBD – to be determined (အကြောင်းအရာတစ်ခုဟာ ဆုံးဖြတ်ဖို့လိုသေးရင် ဒီစကားလုံးကိုသုံးကြပါတယ်။ ဥပမာ - “No. of participant: TBD”)
20. OOO – out of office (အကြောင်းကိစ္စတစ်ခုခုကြောင့် အချိန်ပိုင်းပဲဖြစ်စေ ရက်တော်တော်ကြာဖြစ်စေ ရုံးမှာမရှိတဲ့အကြောင်းကို ကိုယ့်ရဲ့မက်ဆေ့ခ်ျတွေမှာဖော်ပြချင်ရင် “I will be OOO until Tuesday.”)
21. WFH – work from home (တချို့တချို့သောလူတွေဟာ သူတို့ရဲ့အလုပ်တွေကို ရုံးမှာမဟုတ်ဘဲ အိမ်မှာနေပြီးပြီးအောင်လုပ်နေတယ်ဆိုတာကို သူတို့ရဲ့အထက်လူကြီးနဲ့ လုပ်ဖော်ကိုင်ဖက်တွေကိုပြောပြတဲ့အခါမှာ သုံးလေ့ရှိပြီး အဲဒါဟာ ရုံးမှာဘယ်သူကတော့ရှိတယ် ဘယ်သူကတော့မရှိဘူးဆိုတာကို သိစေဖို့အတွက် အထောက်အကူဖြစ်ပါတယ်။)
22. YTD – year to date (ပြက္ခဒိန်နှစ်ပဲဖြစ်ဖြစ် ဘဏ္ဍာရေးနှစ်ပဲဖြစ်ဖြစ် နှစ်တစ်နှစ်ရဲ့ ကိုယ်ရောက်နေတဲ့လက်ရှိအချိန်ကို ရည်ညွှန်းဖော်ချင်လျှင် သုံးပါတယ်။ ဥပမာ - ကိုယ့်ရဲ့အစီရင်ခံစာမှာ အသားတင်အမြတ်ငွေပမာဏကို ဖော်ပြချင်တဲ့အခါမှာ “We’ve made $800,000 in sales YTD.”)
အခုဖော်ပြထားတဲ့အတိုကောက်စာလုံးတွေက စီးပွားရေးလုပ်ငန်းသုံးအင်္ဂလိပ်စာရေးသားနည်းမှာ အသုံးများလေ့ရှိတာတွေပဲဖြစ်ပါတယ်။ ဒီလိုစကားလုံးတွေဟာ ကိုယ့်ရဲ့ e-mail ကို ကျစ်လစ်သွားအောင် ကူညီပေးနိုင်သလို အချိန်တိုတိုအတွင်းမှာ အလုပ်တွင်ကျယ်အောင်လည်း အထောက်အကူဖြစ်နိုင်ပါလိမ့်မယ်။
Credit_to_original_writer

Computer တလုံးဝယ်တော့မယ်ဆိုရင် #

PC SPECS AND SYSTEM REQUIREMENTS 🧐

# System Requirements #

အရင်ဆုံးစဉ်းစားရမှာက ဘာအတွက်အဓိကသုံးမလဲ ဆိုတာ 🧐
စာစီစာရိုက် ခွေကြည့် ကျောင်းသုံး ရုံးသုံးလောက်ဆိုရင်
သိပ်စဉ်းစားနေစရာမလိုပါဘူး၊ ကြိုက်နှက်သက်ရာ ရွေးဝယ်လိုက်ယုံပါပဲ
စဉ်းစားရမှာက Game ဆော့မယ် Softwares ကြီးကြီးမားမား သုံးတော့မယ်ဆိုရင်တော့ စဉ်းစားရွေးချယ်ရပါတော့မယ်
ကိုယ်သုံးချင်တဲ့ Games (သို့) Softwares ရဲ့ လိုအပ်ချက်
(System Requirements) နဲ့ကိုက်ညီမယ့် စက်ကိုရွေးချယ် ၀ယ်ယူရပါမယ်၊ အမေးများတဲ့ မေးခွန်းလေးတွေပါ၊
@ PUPG ဆော့လို့ရလား
@ Dota ရလား
@ Autocad နိုင်လား
၀ယ်ယူမယ့်စက်နဲ့ အသုံးပြုချင်တာနဲ့ ကိုက်ညီမှု ရှိမရှိ
စစ်ဆေးနိုင်ဖို့ အသုံးပြုချင်သော Games (သို့) Softwares ရဲ့ System Requirements ကို Google မှာရှာကြည့်နိုင်ပါတယ် (ပုံမှာကြည့်ပါ)

# PC SPECS #

laptop တစ်လုံးဝယ်မယ်ဆိုရင် i3 လား i5 လား၊ generation ဘယ်လောက်လဲ၊ ram ဘယ်လောက်လဲ၊ graphic ကရောဘယ်လောက်ပါလဲ၊ HDD ရောဘယ်လောက်လဲ စသည်ဖြင့် ယေဘူယျမေးမြန်းတတ်ကြပါတယ်။ ဟုတ်ပြီ။ ကိုယ်တိုင်လဲ စစ်ဆေးကြည့်လို့ရပါတယ်။

စစ်ဆေးကြည့်ဖို့ဆိုရင် -

window key + pause break key နှိပ်ပါ

processor မှာ i3-3110M လို့ ပြပါတယ်။ i3 ကတော့ ရှင်းပါတယ်။ Brand Modifier ပါ။ 3110 ရဲ့ အစစာလုံးက generation ပါ။ 3 ဆိုတော့ third generation ပေါ့။

Installed memory(RAM) ကေတာ့ ram 4GB ပါ။

graphic ဘယ်လောက်ပါလဲ ကြည့်မယ်ဆိုရင် -

window key + r(R) key ကို နှိပ်ပါ။ Run dialog box ကျလာပါလိမ့်မယ်။ အဲမှာ dxdiag လို့ရိုက်ပြီး enter ခေါက်ပါ။ Display ထဲ ဆက်ဝင်ပါ။

Total Memory 1766MB ပါ။ (1024MB = 1GB)

HDD ကကြည့်ရလွယ်ပါတယ်။ window key + e(E) key နှိပ်ပြီး C နဲ့ D ပေါင်းကြည့်လိုက်ပါ။ HDD 500 GB ပါရင် သုံးလို့ အဆင်ပြေပြေရှိတယ်ပေါ့။ အဲထက်နည်းရင်တော့ data သိမ်းတာ ချွေတာရေးတွေ လုပ်ဆောင်ရပါလိမ့်မယ်။ 500GB++ ပါရင် ok စိုပြေပဲ။ ဗဟုသုတပြောပြရရင် SSD ဆိုတာ ရှိပါသေးတယ်။ HDD ထက် 30% ပိုမြန်တယ်လို့ဆိုပါတယ်။

ယခု အချက်အလက်တွေအပေါ် ချင့်ချိန်ပြီး laptop တစ်လုံးဝယ်ဖို့ ဆုံးဖြတ်သင့်ပြီလားဆိုတော့ မပြည့်စုံသေးဘူးလို့ပြောရပါမယ်။

CPU ရဲ့ performance ကလည်း အရေးကြီးပါတယ်။ ပထမဆုံး ကိုယ်က ဘာအတွက်သုံးချင်တာလဲ သိရပါမယ်။ ပုံမှန် software လေးတွေသုံးချင်တာလား၊ ပုံမှန် game လေးတွေပဲ ဆော့ချင်တာလား။ ဒါမှမဟုတ် photoshop တို့လို၊ video editing တို့လို၊ ပြီးတော့ အတန်အသင့်မြင့်တဲ့ဂိမ်းမျိုးတွေ ဆော့ချင်တာလား ဆုံးဖြတ်ရပါမယ်။(ဟဲဗီးသုံးချင်သူတွေအတွက်ကတော့ ရှင်းပါတယ် gaming laptop မှတပါး အခြားမရှိပါဘူး။)

CPU မှာ B, U, M, H, HQ, K စသည်ဖြင့် series တွေ ရှိပါတယ်။(ဘယ်လိုကြည့်ရလဲဆိုတော့ 7500U ဆို U series ပါ။ 3110M ဆို M series ပါ။)

B, U က low performance ပါ။ ဒါပေမယ့် သူ့ရဲ့အားသာချက်က ဘက်ထရီကြာကြာခံပါတယ်။ ပုံမှန် software တွေကို ဇိမ်လေးနဲ့သုံးချင်တယ်ဆို ရွေးချယ်သင့်တဲ့ အမျိုးအစားပါ။ ကွန်ပျူတာ အပူချိန်တက်တာ သက်သာတဲ့ အားသာချက်လဲ ရှိပါတယ်။ ကွန်ပျူတာအမျိုး အစားအပေါ်မူတည်ပြီး display ပိုင်း အားသာချက်တွေလည်းရှိပါတယ်။ B, U series က low performance ဆိုပေမယ့်လည်း photoshop, video editing(not professional) နဲ့ ပုံမှန်ဂိမ်းတွေ ကောင်းကောင်းဆော့ရပါတယ်။

H, HQ, K ကတော့ high performance ပါ။ ကွန်ပျူတာအပူချိန်မြင့်ခြင်း၊ ဘတ်ထရီစားခြင်း စတဲ့ အားနည်းချက်တွေ ရှိပါတယ်။ စျေးမြင့်တဲ့ gaming laptop တွေမှာ အသုံးပြုလေ့ရှိတာကြောင့် cooling စနစ်ကောင်းကောင်းနဲ့ cover ပြန်လုပ်ထားတော့ OK တာပေါ့။

M ကတော့ B, U ထက်စာရင် CPU performance ကောင်းပါတယ်။ နည်းတူပဲ အပူချိန်မြင့်၊ ဘတ်ထရီစားစတဲ့ အားနည်းချက်တွေရှိပါတယ်။ တခြား U series စျေးမြင့်တာနဲ့ ယှဉ်ရင်လည်း အားနည်းချက်တွေ ရှိနိုင်ပါတယ်။

ဒါနဲ့ ကျန်ခဲ့တာလေး ပြောပြပါဦးမယ်။ i3-3110M နောက်က 2.40GHz က clock speed ပါ။ ရိုးရိုးလေးတွေးလိုက်တဲ့အတိုင်း clock speed များရင် ပိုကောင်းပါတယ်။ ပိုသိချင်ရင်တော့ What is ဆိုပြီး google ခေါက်လိုက်တာ ပိုအဆင်ပြေပါတယ်။

-----------------------------------------------------------------------------------

Computer မှာ Core i3, Core i5, Core i7 တွေက ဘယ်လို ကွာခြားသလဲ …..

Central Process Unit (CPU) ကို နောက်ထပ် Processor လို့ခေါ်တယ်ဆိုတာ ကျွန်တော်တို့ သိထားခဲ့ပြီးကြပါပြီ … အရင်က Software လိုအပ်ချက်တွေ ကြောင့် ကျွန်တော်တို့ Processor တစ်ခုမက အများကြီးကို ထည့်သွင်းအသုံးပြုချင်တဲ့အခါ Mother Board ရဲ့ နေရာအခက်အခဲတွေကြောင့် အဆင်မပြေဖြစ်ရပါတယ်။

ဥပမာ- Mother Board မှာ Processor (2) လုံး တပ်ရင် သိပ်ပြီး နေရာအခက်အခဲမရှိပေမယ့် (4) လုံးလောက် တပ်ရတော့မယ်ဆိုရင် နေရာအခက်အခဲ ပြဿနာတွေဖြစ်လာပါပြီ ။ ဒါပေမယ့် ဒီဘက်ခေတ်မှာ Processor အရေအတွက်တိုးပြီးတပ်ဆင်ရမယ့်အစား Processor တစ်ခုထဲမှာပဲ Core တွေကို ထည့်သွင်းဖန်တီးလိုက်တဲ့အတွက် Multiprocessor တွေ ပေါ်လာရပါတယ် ။

Processor တစ်ခုအတွင်းမှာ Core (2) ခု ထည့်ထားရင် Dual Core ဒါမှမဟုတ် Core 2 Duo ၊ Core (4) ခု ထည့်ထားရင် Quad Core ၊ Core (8) ခု ထည့်ထားရင် Octal Core စသဖြင့် ခေါ်ကြပါတယ် …

အခု အဓိက ပြောပြချင်တာက Intel ရဲ့ core processor တွေမှာ Core i3, Core i5, Core i7 ဆိုတာ ကွဲပြားနေတဲ့အကြောင်းနဲ့ သူတို့တွေရဲ့ ကွာခြားချက်တွေပါ ။ ယေဘုယျအားဖြင့်တော့ Core i5 က Core i3 ထပ်ပိုကောင်းတယ်ပေါ့ …. I7 ကတော့ အကောင်းဆုံးပေါ့ဗျာ ….

Intel Core i3 Processor တွေက Dual Core ဖြစ်ပါတယ်။ ပြောချင်တာက အထဲမှာ တကယ်အလုပ် လုပ်တဲ့
CPU Core ၂ ခုပါဆိုတာကိုပါ။ ဒါပေမယ့် သူ့မှာ အားသာချက်ရှိတယ်။ အဲဒါက Core 1 ခုမှာ Thread ၂ ခုကို ကိုင်တွယ်နိုင်တဲ့ နည်းပညာပါလို့ 2 Cores / 4 threads ဖြစ်သွားပါတယ် ။ အဲဒါကြောင့် Window OS ထဲမှာ သွားကြည့်ရင် CPU 4 ခုရှိတယ်လို့ပဲ မြင်ရမှာပါ။ Thread ဆိုတာ processor ကို instruction ပေးပို့ရာမှာ လမ်းကြောင်း 1ခု 2ခု 4ခု 8ခု စသဖြင့်ရှိပါတယ် 2ခုနဲ့2ခုအထက်ကို multi-thread လို့ခေါ်ပါတယ်..

Core i5 ကတော့ 4 Core (Quad-Core) processor ဖြစ်ပါတယ်။ အမှန်တကယ် run တဲ့ physical cores 4 ခု ပါပါတယ်။ ဒါပေမယ့် သူက i3 လိုတော့ Hyper thread ကို Support မလုပ်ပါဘူး။ သူ့အားသာချက်က Core 4 ခု လုံး သုံးမနေဘူးဆိုရင် လက်ရှိသုံးနေတဲ့ Clock speed ကို သတ်မှတ် Speed ထက် ပိုပြီး မြန်မြန်လုပ်ခိုင်းနိုင်တာပါပဲ။ အဲဒါကို Turbo Boost နည်းပညာလို့ခေါ်ပါတယ်။ Turbo Boost ဆိုတာ လိုအပ်တဲ့ အချိန်မှာ core တစ်လုံး နဲ့တစ်လုံး ပေါင်းစည်းလုပ်ဆောင်ပေးပါတယ်။ i5 မှာ i3 ထက်သာတဲ့အချက်ဟာ Turbo Boost ဖြစ်ပါတယ်။

နောက်ဆုံး Core i7 …..
သူက အကောင်းဆုံးပေါ့နော်။ အကောင်းဆုံးဖြစ်နေရတာလဲ သူ့အကြောင်းအရင်းနဲ့ သူပါ ။ Core i7 ဟာ Quad Core ဖြစ်တဲ့အပြင် i5 မှာတုန်းက သုံးထားတဲ့ Turbo Boost လည်းပါ၀င်လာပါတယ် ။ Hyper Thread နဲ့လည်း ကောင်းကောင်း အလုပ် လုပ်ပါတယ် ။ Hyper-threading ဆိုတာ processor တစ်လုံးထဲကမှ အချိန်တစ်ခုထဲမှာပင်လျင် thread နစ်ခုကို တစ်ပြိုင်နက်ထဲ တာ၀န်ထမ်းဆောင်နိုင်ပါတယ်ဒါကြောင့် Window OS ထဲမှာဆို Core 8 ခု ပါတယ်လို့ မြင်ရမှာပါ။ တကယ် Core (4) ခုအပြင် Thread ကြောင့်မို့ ထပ်ပွားလာတဲ့ cores က နောက်ထပ် 4 ခု ဖြစ်လာပါတယ် ။ ဒါကြောင့် လည်း Core i7 ဟာ Multithread Application တွေကို ကောင်းကောင်း ကိုင်တွယ်နိုင်တာပါ ။

နောက်ပြီး Core i3/i5/i7 တွေမှာ နောက်ထပ် ကွာဟစေတဲ့အချက်က cache memory ဖြစ်ပါတယ်။ CPU တစ်ခုမှာ စွမ်းဆောင်ရည် ကောင်းစေဖို့ cache memory ဟာ တကယ့် အရေးကြီးဆုံးပါပဲ ။ Core i3 CPU မှာ 3MB cache ပဲ ပါပြီး Core i5 CPU တွေက 4MB ကနေ 6MB ထိ ပါပါတယ်။ Core i7 CPU ကတော့ cache memory 8MB တောင်ပါတာဆိုတော့ သူ အကောင်းဆုံးဖြစ်နေတာမဆန်းတော့ပါဘူး…

ဒီလောက်ဆိုရင် core i3/i5/i7 တွေရဲ့ ကွာခြားချက်တွေကို သတိထားမိလောက်ပါပြီ ….
-----------------------------------------------------------------------------

Credit -မူရင်းရေးသားသူ