CODM

مايقلق اكثر ليس فقط رعونة المهاجمين لي عندنا ولكن حتى الكرات التابثة ماكنخلقو منها حتى خطورة وكيف كنعرفو نسبة كبيرة دالاهداف كتسجل منها بينما خسرنا مقابلات باهداف من كرات تابثة والسبب سوء التغطية ديال المدافعين وخاصة بوناگات .
لا ركنيات لا ضربات الخطأ لا تسديد من بعد ، حتى وسط الميدان عنا ميت هجوميا فاش كيدخلو الاضهرة من جناب كتلقاش وسط الميدان داير زيادة عددية ويدخل المربع ويسجل والو .

اخر حل بقى لينا هو ديرو الرقية للاعبين ولدوك الشباكي والاعبين يبقاو يتوضاو عاد يدخلو الملعب راه بزاف على هاد العكس .

لا حول ولا قوة الا بالله،
الله يعفو علينا من اشباه المسيرين والسمسارة والمتملقين والطبالة والخشب ...

حذاري تريبو داكشي لي بنيناه وتقتلنا عليه لسنين !
راه ساهل تجي تبقى تسب وتعاير ولكن راه ماشي حل هاد العابة هوما لي عندك وهوما لي غتكمل بيهوم العام اذن خاص الحكمة راه باقي لينا 11 الماتش وصحيح ماستطعناش ربحو مؤخرا او نسجلو ولكن راه وصلنا الشباك لولا رعونة بعض الاعبين ، يعني كاين شي حوايج خاص نحافظو عليهوم ونبنيو عليهوم .

وخاص تعرف ان بعض الاعبين راه شخصيتهوم ضعيفة راه ماكيتحملوش الضغط ولزدتي ضغطتي عليهوم وسبيتيهوم راه غي غيزيدو يتكفسو ، خاص تعرف تعامل معاهوم بحكمة تضغط عليهوم فالملعب وفنفس الوقت تشجعهوم وتشحنهوم باش يزيدو يعطيو .
وماتنساوش اننا نهضنا من الرماد يعني قسنا القاع ، بحال شي واحد راجع من الموت ماعندو ما يخسر .

كلنا باغيين نشوفو فريقنا فالقمة ولكن ليس بهكدا تأكل الكتف ، خاص حسن التسيير اولا عاد المدير الرياضي تم المدرب واخر وحدين تلومهوم هوما الاعبين ، حتى الا ماعجبكش شي لعاب او كان ضعيف خاص تلوم لي جابو بعدا ثم لي دخلو وماعرفش يوضفو فالملعب عاد تهضر مع لعاب .

وشكرا الريدمان على زيارة الاعبين وتكلم معهم وزيارة زيناف فالمستشفى والإطمئنان على حالته الصحية ، هدي نقطة تحسب لهم لي دائما عودونا بالحكمة ديالهوم .

وديما كوديم

التحيز ديال التحكيم لبعض الفرق هدشي جاري بيه العمل فالبطولة ولكن هاد الموسم التحكيم متكي علينا بالمزيان فاي ماتش ، ماشي ضروري الحكم يحيد ليك هدف او يحسب ضدك ضربة جزاء او هدف لي ماكيناش باش يتحسب راه ضدك الماتش كيتلعب على تفاصيل صغير والحكم كيلعب دور كبيير فهاد التفاصيل .
فاش الحكم كيبقى اي لاعب ففريق الخصم كيطيح كيصفر ليه بينما انت كتاكل العصا وهو كيگولك كمل مافيها والو ، فاي تماس او ركنية او تسلل كيحسبها ضدك ،فاي هجوم مضاد كيوقفك ويگولك رجع الخطأ ....
المهم الحكم كيسير الماتش ضدك .
حتى من هاد تقنية الڤار كيستافدو منها بعض الفرق فقط اما انت لبغيتيه يرجع الڤار خاصك تبقى ترغبو وتحتج وتدي صفرات فابور وتضطر تخرج الكورة وطيح وتطلب الطبيب يدخل باش تربح الوقت فين يبقى الحكم الوقت يرجع الڤار ، وفي حالة رجع الڤار كيحسسك انه داير فيك خير والا قدر الله وكان معاك الحق كتبان على الملامح دالحكم انه معاجبوش الحال وماراضيش وكيعلن على القرار غي مرغم .
وحتى المخرج متواطئ لمدرتيش سينيما وماحبستيش الماتش ماتسناش يدير ليك اعادة كيكمل كأن حتى حاجة ماوقعات .

شفنا حكم كيطلب المعذرة من جماهير طنجة من بعد ماخسرو ، شفنا حكم كيطلب السماح من مشط بعد اعطائه البطاقة الصفراء ....

ولكن هاد العفن الكروي والفساد والتحيز كيف گلت جاري بيه العمل فهاد البلاد لدلك مانرميوش الفشل ديال المكتب والعشوائية دالمدير الرياضي ومحدودية وخوف الدنيبي على التحكيم .

هل تعلم اننا درنا الاستعدادات فالصيف ب 8 مهاجمين ؟

كنهضرو غي على رأس الحربة فقط وليس الاجنحة .
فالصيف الفريق تعاقد مع كل من :
الصهد
الخنوس
فرحان
القيرع
كروز
وكان عندنا كل من الديب والمهراوي والصهاجي اي مجموع 8 مهاجمين وفبداية الموسم تم بيع الاعب المهراوي وفسخو عقد القيرع وبقاو 6 دالهاجمين من بعد تم انزال الصنهاجي الفريق الامل وبقينا غي ب 5
فالانتقالات الشتوية تم فسخ العقد دكل من الخنوس وفرحان لي مالعب حتى دقيقة وارسال كروز اعارة لشباب اطلس خنيفرة وبقاو فقط 2 مهجامين لي هوما الديب والصهد .
اليوم كنلعبو بالديب فقط وغياب الصهد عن الائحة وكرقعو ببعض الاعبين .

هدشي بلا منهضرو على الاجنحة لي سخفانين وارقام ضعيفة الا مگلناش منعدمة

شكون السبب فهاد العشوائية وهاد التخربيق ؟؟؟
وما الفائدة من 7 مهاجمين وفالاخير ما تستافد حتى من واحد ؟؟؟
اين هو المدير الرياضي فهدشي ؟؟؟