Coin pub

كتكون گالس مخدامش سيمانة جوج سيمانات ...!
واحد النهار كيصوني تيليفون ألو السلام وعليكم فلان هذا أه هو هذا ,عندي واحد الخدمة تجي تشوفها مرحبا نجيك كتقطع المكالمة وكتقول الحمد لله هاهي الخدمة جات وأنت غادي عند السيد كتقول مع راسك ياربي نلقى شي خدمة كبيرة نعوض فيها هادشي لي گلست
وصلتي عند السيد لقيتيها خدمة كبيرة فرحتي !
بطبيعة الحال غتفرح (الوقت بغات الخدمة وبغات الفلوس)
وأنت كتناقش معاه على حسب الديكور والخدمة لي بغا قالك بلي النمرة عطاها ليا واحد السيد خدمتي ليه فالبلاصة الفلانية وگالي بلي خدمتك متقونة والله اعمر هدار ...كتقول ليه بارك الله فيه
هنا كتقول فراسك مادام هاد السيد جا من طرف كليان ديالي فأكيد غنتفاهم أنا وياه . (وخا هكاك غندير معاه ثمن مناسب لا ضرر ولا ضرار ) كتعبر الخدمة وكتقول ليه التوطال كامل وتيسكت شوية وتيقول ليك بزاااف داك الثمن !!! وزعما راه تصايبتي معاه
كتقول نزيد نقص واحد شويه ونقضيو الغرض (ولكن ماشي طيح الثمن باش تسما خدام راسك ) تيقولك مزااال خاصك تنقص .
هنا انت غير كتعجب أشمن ثمن بغا هدا !!
شوية تيقولك بحال هاد الخدمة خدمها واح النسيب غييير ب كدا وكدا ... ! هنا أنت كتشوف خدمتك ماشي ديال داك الثمن كتقول ليه لا ممسلكنيش وهو يقول ليك المهم غانشوف ونرد عليك !!!!
وملي إقوليك مول الدار هاد الجملة غير نساه راه تيقلب على قل الثمن . وانت خارج عندو طالع ليك الدم وكتقول علاااش ووو
هنا غنعلمك واحد الذكر كلنا تنعرفوه تقريباً وتنقولوه مورا الصلوات الخمس إلى قلتيه وفهمتيه مزيان فكن على يقين أنك غترتاااااح فبحال هاد المواقف .
الذكر هو "اللهم لا مانع لما أعطيت ولا معطي لما منعت ولا ينفع دا الجد منك الجد " ربي سبحانه إلى عطاك شي حاجة مكاينش لي غيحيدها ليك وإلى معطاهاش ليك فراه مكاينش لي غيعطيها ليك من غيروا . إذن المسألة أرزاق ونصيب ، والحل الرضى وأن تسلم أمرك لله وحده وتقول الحمد لله على ما نحب ونكره .
والسلام عليكم ورحمة الله...