Note Pages

"ငါရော ဘယ်လို ခံစားနေရလဲ..."

တစ်ခါတလေ ကိုယ်ဟာ သူများရဲ့ခံစားချက်တွေကို အရမ်းဂရုစိုက်မိကောင်း ဂရုစိုက်မိနေပါလိမ့်မယ်။
သူ စိတ်မကောင်းဖြစ်သွားမလား၊ အဆင်ပြေပါ့မလား၊ ကိုယ်ပြောလိုက်တဲ့စကားကြောင့် ဘယ်လိုခံစားသွားမလဲဆိုတာတွေကို ကိုယ့်စိတ်ထက် သူများစိတ်ကို ဦးစားပေးပြီး ကြိုတွေးပေးနေမိတတ်တာတွေ ရှိကောင်းရှိပါလိမ့်မယ်။

အဲဒီလို သူများကို နားလည်ပေးရင်းနဲ့ တစ်နေ့မှာ ကိုယ့်စိတ်ထဲက အသံကိုတောင် ကိုယ်တိုင် ပြန်မကြားမိတော့တဲ့အချိန်တွေ ရှိလာတတ်ပါတယ်။

တကယ်တော့ ကိုယ်က သူများအတွက် အမြဲစဉ်းစားပေးနေတာနဲ့ သူများကလည်း ကိုယ့်အတွက် အဲဒီလို စဉ်းစားပေးမယ်လို့ တွေးထားလို့ မရပါဘူး။
လူတိုင်းဟာ ကိုယ့်လို သူများရဲ့ခံစားချက်တွေကို အသေးစိတ်လိုက်တွေးပေးတတ်ကြတာ မဟုတ်ဘူး။

ဒါကြောင့် သူများကို နားလည်ပေးသလို ကိုယ့်ကိုယ်ကိုလည်း နားလည်ပေးဖို့ လိုတယ်။
မကြိုက်တာကို မကြိုက်ဘူးလို့ ပြောခွင့်ရှိတယ်။
မလုပ်နိုင်တာကို မလုပ်နိုင်ဘူးလို့ ပြောခွင့်ရှိတယ်။
ပင်ပန်းတဲ့အခါ ခဏနားခွင့်ရှိတယ်။
ကိုယ့်စိတ်ကို ထိခိုက်စေတဲ့အရာတွေကနေ အကွာအဝေးထားခွင့်လည်း ရှိတယ်။

သူများကို စိတ်မကောင်းမဖြစ်စေချင်လို့ ဆိုပြီး ကိုယ့်ကိုယ်ကို အမြဲစိတ်မကောင်းဖြစ်အောင် မလုပ်ပါနဲ့။
တစ်ခါတလေ ကိုယ့်ကိုယ်ကိုလည်း
"ငါရော ဘယ်လိုခံစားနေရလဲ။ ငါရော အဆင်ပြေရဲ့လား" လို့ ပြန်မေးပေးပါ။

ဘာလို့လဲဆိုတော့ ကိုယ့်ခံစားချက်တွေကလည်း သူများခံစားချက်တွေလိုပဲ အရေးကြီးလို့ပါ။
သူများကို နားလည်ပေးတတ်တာက ကောင်းပါတယ်။ ဒါပေမဲ့ အဲဒီနားလည်မှုတွေထဲမှာ ကိုယ့်ကိုယ်ကို နားလည်ပေးဖို့လညိး မမေ့ပါနဲ့။ ။

#ဟန်မင်း(Nightmare&Deep)
(၁၃၊၉၊၂၀၂၆)
https://www.facebook.com/hanmin87

အရွယ်ရောက်လာလေ
ညတွေကို တဖြည်းဖြည်း ပိုပြီး ချစ်တတ်လာတယ် ။

တိတ်ဆိတ်ခြင်းတွေကို မြတ်နိုးတတ်လာပြီး
အေးချမ်းခြင်းတွေကို ခံစားတတ်လာတယ် ။

ကိုယ့်ရဲ့ ဖြစ်တည်မှုလေးကို ပိုချစ်တတ်လာပြီး
ဒီနေ့အထိ ကြိုးစားရှင်သန်နိုင်ခဲ့တဲ့အတွက်
ကျေးဇူးတင်ပါတယ် ။

မနက်ဖြန်မှာလည်း
ထပ်ပြီး ပင်ပန်းရဦးမယ်ဆိုတာ သိနေပေမယ့်
ဒီနေ့လိုပဲ လှပတဲ့ ညလေးကို
ထပ်ပြီး ပိုင်ဆိုင်ခွင့်ရဦးမှာမို့ ကျေနပ်ပါတယ် ။

#ယူနိုရာ

လက်ရှိဘဝမှာ မိုးတွေ ဘယ်လောက်ပဲ သည်းသည်း ရွာနေပါစေ၊ ကိုယ့်ရဲ့ကောင်းကင်ကြီးမှာ သက်တံလေးတစ်စင်း ပြန်ပေါ်လာနိုင်တယ်ဆိုတဲ့ မျှော်လင့်ချက်ကိုတော့ မပျောက်ဆုံးစေချင်ပါဘူး။

"မိုးတိတ်ပြီးနောက် ပေါ်လာမဲ့သက်တံ"

တစ်ခါတလေ ကိုယ့်ဘဝမှာ ဝမ်းနည်းမှုတွေ၊ အခက်အခဲတွေ၊ မျှော်လင့်ချက်မဲ့သလို ခံစားရတဲ့အချိန်တွေ ရှိနေတတ်ပါတယ်။

မိုးရွာနေတဲ့အချိန်မှာတော့
ကောင်းကင်ကြီးရဲ့အလှတရားကို မမြင်နိုင်ပါဘူး။
သို့ပေမဲ့...
မိုးတိတ်သွားတဲ့အခါ သက်တံလေးတစ်စင်း ပေါ်လာနိုင်သလို၊ အခက်အခဲတွေကို ကျော်ဖြတ်ပြီးတဲ့အခါမှာလည်း ကိုယ်မမျှော်လင့်ထားတဲ့ ပျော်ရွှင်မှုလေးတွေကို တွေ့ရှိလာနိုင်ပါတယ်။

ဘဝမှာ ကြုံတွေ့ရတဲ့ အရာအားလုံးဟာ ကိုယ့်ကို နာကျင်စေဖို့အတွက်ပဲ ဖြစ်လာတာမဟုတ်ပါဘူး။ တချို့အရာတွေက ကိုယ့်ကို ပိုသန်မာလာစေဖို့၊ ပိုနားလည်တတ်လာစေဖို့နဲ့ ပျော်ရွှင်မှုရဲ့တန်ဖိုးကို ပိုသိလာစေဖို့ ဖြစ်ပါတယ်။

အမှောင်ရှိနေလို့အလင်းရဲ့တန်ဖိုးကို သိလာရတာဖြစ်သလို မိုးရွာလို့သာ သက်တံရဲ့အလှကို မြင်လာရတာ ဖြစ်တယ်။ နာကျင်မှုတွေ ရှိခဲ့လို့ပဲ ငြိမ်းချမ်းခြင်းရဲ့ အဓိပ္ပာယ်ကို ပိုနားလည်လာရတာ ဖြစ်ပါတယ်။

ဒါကြောင့် လက်ရှိဘဝမှာ မိုးတွေ ဘယ်လောက်ပဲ သည်းသည်း ရွာနေပါစေ၊ ကိုယ့်ရဲ့ကောင်းကင်ကြီးမှာ သက်တံလေးတစ်စင်း ပြန်ပေါ်လာနိုင်တယ်ဆိုတဲ့ မျှော်လင့်ချက်ကိုတော့ မပျောက်ဆုံးစေချင်ပါဘူး။ ။

#ဟန်မင်း(Nightmare&Deep)
(၁၆၊၁၀၊၂၀၂၆)
https://www.facebook.com/hanmin87