Happy Bham

. ਕਿਥੋਂ ਕਿੱਥੇ

ਕਿਥੋਂ ਕਿੱਥੇ ਲੈ ਆਏ ਹਾਲਾਤ ਮੇਰੇ।
ਅੱਜ ਕੱਲ੍ਹ ਬਦਲੇ ਬਦਲੇ ਜਿਹੇ ਦਿਨ ਰਾਤ ਮੇਰੇ।

ਕਦੇ ਲਾ ਕੇ ਮਹਿਫ਼ਲ ਤਾਰਿਆਂ ਦੀ,
ਮੈਂ ਚੰਨ ਨਾਲ਼ ਬਾਤਾਂ ਪਾਉਂਦਾ ਸੀ।
ਧਰਤੀ ਜੰਨਤ ਲਗਦੀ ਸੀ,
ਜਦ ਸਾਹਮਣੇ ਯਾਰ ਬਿਠਾਉਂਦਾ ਸੀ।
ਹੁਣ ਲਗਦੈ ਮੁਖ਼ਾਲਿਫ਼ ਹੋ ਗਈ ਐ ਕਾਇਨਾਤ ਮੇਰੇ।
ਅੱਜ ਕੱਲ੍ਹ ਬਦਲੇ ਬਦਲੇ ਜਿਹੇ ਦਿਨ ਰਾਤ ਮੇਰੇ।

ਦਿਨ-ਰਾਤ ਕਦੇ ਫੁੱਲਾਂ ਵਾਂਗੂੰ ਖਿੜੇ ਖਿੜੇ ਹੀ ਰਹਿੰਦੇ ਸੀ।
ਦੁੱਖ ਤਕਲੀਫਾਂ ਹੁੰਦੇ ਕੀ ਨੇ, ਪਤਾ ਨਹੀਂ ਸਾਨੂੰ ਕਹਿੰਦੇ ਸੀ।
ਤੀਆਂ ਵਾਂਗੂੰ ਦਿਨ ਬੀਤਾਕੇ, ਇੱਕ ਹੋਏ ਆਥਣ ਪ੍ਰਭਾਤ ਮੇਰੇ।
ਅੱਜ ਕੱਲ੍ਹ ਬਦਲੇ ਬਦਲੇ ਜਿਹੇ ਦਿਨ ਰਾਤ ਮੇਰੇ।

ਸੱਜਣਾਂ ਸਦਕੇ ਚਾਰ ਚੁਫੇਰੇ, ਗ਼ਮ ਪਾਏ ਆਣ ਪਸਾਰੇ ਨੇ।
ਬਹੁਤਾ ਹੱਕ ਜਤਾਉਣ ਵਾਲਿਆਂ, ਫੱਟ ਡੂੰਘੇ ਸੀਨੇ ਮਾਰੇ ਨੇ।
ਜਿੱਤ ਮੇਰੀ ਲਈ ਸੁੱਖਾਂ ਸੁਖਦੇ, ਪੱਲੇ ਪਾ ਗਏ ਮਾਤ ਮੇਰੇ।
ਅੱਜ ਕੱਲ੍ਹ ਬਦਲੇ ਬਦਲੇ ਜਿਹੇ ਦਿਨ ਰਾਤ ਮੇਰੇ।

ਹੈਪੀ ਭਾਮ

. ਸੋਚਾਂ

ਬੁੱਲਟ 'ਤੇ ਚੜ੍ਹ ਮੁੰਡਾ ਗੇੜੀਆਂ ਵੀ ਲਾਵੇ।
ਮੋੜਾਂ ਉੱਤੇ ਖੜ੍ਹ-ਖੜ੍ਹ ਟੌਹਰ ਵੀ ਬਣਾਵੇ।
ਉਹ ਤਾਂ ਲੰਘ'ਜੇ ਵਰੋਲੇ ਵਾਂਗੂੰ ਖਹਿ ਕੇ, ਕੁੜੀ ਤੋਂ ਦਿਲ ਕਿੰਝ ਮੰਗੀਏ,
ਮੁੰਡਾ ਸਾਰਾ ਦਿਨ ਸੋਚੇ ਬਹਿ-ਬਹਿ ਕੇ, ਕੁੜੀ ਤੋਂ ਦਿਲ ਕਿੰਝ ਮੰਗੀਏ।

ਪਰੀਆਂ ਜਿਹੀ ਸੂਰਤ 'ਤੇ ਫਿਰਦਾ ਏ ਡੁੱਲਿਆ।
ਛੁੱਟੀਆਂ ਪੜ੍ਹਾਈਆਂ ਨਾਲ਼ੇ ਖਾਣਾ-ਪੀਣਾ ਭੁੱਲਿਆ।
ਬਾਤਾਂ ਤਾਰਿਆਂ ਨਾ' ਪਾਉਂਦਾ ਰਹਿ-ਰਹਿ ਕੇ, ਕੁੜੀ ਤੋਂ ਦਿਲ ਕਿੰਝ ਮੰਗੀਏ,
ਮੁੰਡਾ ਸਾਰਾ ਦਿਨ ਸੋਚੇ ਬਹਿ-ਬਹਿ ਕੇ, ਕੁੜੀ ਤੋਂ ਦਿਲ ਕਿੰਝ ਮੰਗੀਏ।

ਮਿਲ ਜਾਵੇ 'ਰੇਂਜ' ਚੰਦਰੇ ਦਾ ਦਿਲ ਚਾਹੁੰਦਾ ਏ।
ਕਰ-ਕਰ ਮਿੰਨਤਾਂ ਉਹ ਬਾਪੂ ਨੂੰ ਮਨਾਉਂਦਾ ਏ।
ਲਿਆ 'ਐਪਲ' ਬੇਬੇ ਨੂੰ ਕਹਿ-ਕਹਿ ਕੇ, ਕੁੜੀ ਤੋਂ ਦਿਲ ਕਿੰਝ ਮੰਗੀਏ,
ਮੁੰਡਾ ਸਾਰਾ ਦਿਨ ਸੋਚੇ ਬਹਿ-ਬਹਿ ਕੇ, ਕੁੜੀ ਤੋਂ ਦਿਲ ਕਿੰਝ ਮੰਗੀਏ।

ਉੱਠ ਕੇ ਸਵੇਰੇ ਹੁਣ ਜਿੰਮ ਵੀ ਲਗਾਉਂਦਾ ਏ।
ਮਾਰ ਮਾਰ ਵੇਟ ਮੁੰਡਾ ਮਸਲ ਬਣਾਉਂਦਾ ਏ।
ਚੁੱਕੇ ਡੰਬਲ ਸ਼ੀਸ਼ੇ ਦੇ ਅੱਗੇ ਬਹਿ ਕੇ, ਕੁੜੀ ਤੋਂ ਦਿਲ ਕਿੰਝ ਮੰਗੀਏ,
ਮੁੰਡਾ ਸਾਰਾ ਦਿਨ ਸੋਚੇ ਬਹਿ-ਬਹਿ ਕੇ, ਕੁੜੀ ਤੋਂ ਦਿਲ ਕਿੰਝ ਮੰਗੀਏ।

ਦਿਨ ਢਲੇ਼ 'ਭਾਮ' ਨਿੱਤ ਗੁਰੂ ਘਰ ਆਉਂਦਾ ਏ,
ਇੱਕੋਂ ਅਰਜ਼ੋਈ ਮੁੜ-ਮੁੜ ਦੁਹਰਾਉਂਦਾ ਏ,
ਸੁੱਖਾਂ ਸੁੱਖਦਾ ਬਾਬੇ ਦਾ ਨਾਂ ਲੈ ਕੇ, ਕੁੜੀ ਤੋਂ ਦਿਲ ਕਿੰਝ ਮੰਗੀਏ,
ਮੁੰਡਾ ਸਾਰਾ ਦਿਨ ਸੋਚੇ ਬਹਿ-ਬਹਿ ਕੇ, ਕੁੜੀ ਤੋਂ ਦਿਲ ਕਿੰਝ ਮੰਗੀਏ।

ਹੈਪੀ ਭਾਮ