Taskafe

Jodi a fanmi an te rive
Nan vil okay Pou pote yon chay lanmou nan kè drapo nou
Malgre tout bagay fòk nou toujou raple yo
Nou te koud li ak san nou

Kri Katrin Flon

Katrin Flon leve kanpe
Ak zegwi nan men l
Li t ap koud rèv yon pèp
Nan mitan san ak soufrans.
Ble ak wouj te chire
Tankou kè pitit peyi a
Men nan mitan tanpèt la
Li mare lespwa ak fyète ansanm.
Kri Katrin Flon
Se pa sèlman kri yon fanm
Men kri tout yon nasyon
K ap mande respè ak liberasyon.
Li tande rèl manman yo
Ki pèdi pitit anba bal
Li wè jèn yo k ap tonbe
Tankou fèy sèch nan move van.
Katrin Flon kriye fò :
“Kilè pitit Ayiti va ini ?
Kilè men nou va kole
Pou rebati sa ki kraze ?”
Paske drapo pa yon twal sèlman
Se memwa zansèt yo
Se san Dessalines ak Kristòf
Ki wouze tè libète a.
Kri Katrin Flon
Ap travèse mòn ak plenn
Pou rele tout pitit peyi :
“Kanpe pou diyite nou !”
Si demen fènwa anvayi syèl la
Nou dwe tounen limyè
Paske Ayiti pap peri
Toutotan pitit li sonje rasin yo.
Kri Katrin Flon
Se kri rezistans
Se kri lanmou pou peyi
Se kri yon drapo
K ap flote malgre tanpèt.

Se drapo flote sou san

Drapo m nan pa t koud ak dòmi
Li koud ak rèl, ak chenn, ak soufrans lavi
Li tranpe nan swe zansèt ki te kanpe djanm
Pou rele libète anba kout fizi ak flanm
Se drapo flote sou san
Sou san Desalin, sou san tout vanyan
Sou san manman ki kriye pitit yo pèdi
Sou san peyizan yo kraze nan mitan lannwit
Ble a pote rèv yon pèp ki vle leve
Wouj la se dife revolisyon ki pa janm sispann brile
Chak koud fil ladan se yon istwa rezistans
Yon pèp ki toujou kanpe malgre tout soufrans
Drapo sa pa yon moso twal sèlman
Se memwa yon nasyon k ap goumen chak tan
Lè l ap flote anba syèl Ayiti
Se vwa zansèt yo k ap rele : “Pa janm trayi peyi!”
Nou wè twòp dlo nan je sou tè sa
Twòp san koule anba solèy la
Men chak gout san ki tonbe atè
Fè rasin libète pouse pi rèd toujou sou tè zansèt
Se drapo flote sou san
Men li poko sispann pote espwa pou timoun yo demen
Paske toutotan Ayisyen kenbe diyite l vivan
Pap gen okenn fòs ki ka touye lespri vanyan
Leve drapo a byen wo nan syèl la
Pou mond lan wè Ayiti pap janm bese bra
Menm lè tanpèt vle kraze rèv nou yo
N ap toujou rete pèp ki fèt pou mache tèt dwat anba drapo.
Wou ak Plim

M pran plim mwen tankou yon zam,
M tranpe l nan doulè pèp mwen an,
M ekri ak dlo nan je manman,
Ak san jèn k ap tonbe sou beton.
Wou lavi a kontinye vire,
Li pase sou rèv anpil pitit peyi,
Li kraze espwa, li kraze souri,
Men li pa janm kraze volonte nou viv.
Gen jou se grangou k ap chante,
Gen nuit se bal k ap fè mizik,
Men anba sann dife mizè a,
Toujou gen yon ti limyè k ap klere.
Plim mwen pa fèt pou bay manti,
Li fèt pou rele laverite,
Pou denonse mechanste,
Pou plante grenn libète.
Wou tan an vire san pran souf,
Li pote trayizon ak soufrans,
Men li pote espwa tou,
Pou sila ki pa janm lage.
Mwen se pitit yon tè rebèl,
Yon tè ki leve anba chenn,
Kote Desalin te plante diyite,
Pou pitit peyi pa janm bese tèt.
Se poutèt sa m ap ekri toujou,
Menm lè nwaj bouche syèl la,
Paske chak mo mwen lage sou papye
Se yon kout tanbou pou reveye konsyans.
Wou ak plim,
Youn vire, youn ekri,
Youn pote listwa, lòt la rakonte l,
Pou demen pa janm bliye yè.

Kadav Sou Pye

Nan fè foli dèyè grenn pèpè
Yo chanje lespri n, yo vòlè idantite n
Nan chita tande ti pastè ak pè
Yo fè n mache je fèmen dèyè yo
Tankou mouton y ap mennen labatwa.
Lè nou te pèp tout bon
Nou te konn manje manyòk ak malanga
Pwa kongo ak pwa gwo nèg
Nou te gen fòs nan bra n
Ak diyite nan nanm nou.
Nou te konn danse tanbou
Sou lakou zansèt yo
Nou te konn respekte tè
Paske tè te manman lavi.
Pye mayi te leve tankou drapo libète
Nan chak jaden peyizan.
Men depi nou tonbe
Nan sosis ak diri tyako
Depi bwat konsèv pran plas kalalou
Depi soda ranplase dlo kokoye
Nou pèdi gou rasin nou.
Nou travèse debou
Nou tounen kadav sou pye
K ap souri ak vant vid
K ap chante pandan san n ap koule
K ap vann konsyans nou
Pou yon ti plat cho ak kèk fo pwomès.
Sistèm nan manje n
Tankou tako ak votou
Li rache rèv nou
Li bwè san jenès la
Li fè frè vire do bay frè
Li fè pitit rayi pwòp manman tè yo.
Jodi a peyi a tounen mache tristès
Kote bal ap pale pi fò pase liv
Kote simityè vin pi plen pase lekòl
Kote grangou ap dòmi nan vant timoun
Pandan gwo nèg ap fete sou do pèp la.
Men mwen di non!
Nou pa fèt pou viv ajenou
Nou pa fèt pou n tounen esklav
Nan pwòp peyi zansèt nou te lave ak san.
Leve non pèp vanyan!
Retounen pran rasin nou
Retounen pale ak tè a
Retounen plante pito pou n rekòlte lavi
Paske depi yon pèp bliye kilti l
Se jou sa li kòmanse mouri.
Ann sispann viv tankou kadav sou pye
Pou n ka retounen pèp
Yon pèp ki kanpe
Yon pèp ki sonje
Yon pèp ki deside viv.