NAILA Methodist Church

VUKELULU - 08/07/2026
Macawa ni Junior MYF
ULUTAGA : Na iTekitekivu ni Vosa ni Kalou
LESONI :.Joni : 1:1–5

TIKINA KOUKA – 1:
“E na i vakatekivu sa bula ko koya na Vosa, a rau sa tiko vata kei na Kalou ko koya na Vosa, a sa Kalou ko koya na Vosa.”

NA KENA I VAKAMACALA
Sa vakamacalataka na Vosa ni Kalou ko Joni ni a sa bula ni se bera na iVakatekivu, ka tiko vata kei na Kalou na Vosa, a sa Kalou ko koya na Vosa. Sa kena ibalebale oqo ni Vosa ni Kalou e sega ni dua na ka e qai mai tekivu tu e muri, ia, e tekivu vata sara ga kei na Kalou. E sega talega ni da rawa ni tukuna ni sega ni yaga, baleta ni bula, kaukauwa ka gata na Vosa ni Kalou.
Na iVola Tabu e vosa ceguvi ni Kalou vei ira na Isireli kei na cakacaka vaka-Mesaia nei Jisu Karisito ena lomadra na daunivolavola. Sa ka mai liu sara ni se bera na iVakatekivu ni veibuli, sa bula vakataki koya na Vosa ni Kalou ka vosa ena veitabagone duidui ni nodra volavola na daunivolavola.
Na iVola Tabu e Vosa ni Kalou, meda vakasaqara kina na sala ni noda vakabulai mai na noda i valavala ca ena bula kei na i vakavuvuli nei Jisu Karisito.

TARO ME VEIWASEITAKI
1. Na cava na ka eda vulica rawa ena lesoni oqo? Yadudua, Vakavuvale se Vavakoso Lotu.
2. E rawa ni ra tudei kina vakacava na itabagone lewe ni JMYF?

1) SA BULA TAUMADA NA VOSA MAI NAI VAKATEKIVU NI SA BERA NI BULI NA VURAVURA. IA, SA TIKOVATA KEINA KALOU KO KOYA NA VOSA.
**JONI 1:1 - 2
[1] E Nai vakatekivu sa bula ko koya na Vosa, a rau sa tiko vata kei na Kalou ko koya na Vosa, a sa Kalou ko koya na Vosa.
[2] E nai vakatekivu erau sa tiko vata ko koya oqo kei na Kalou,

2) SA CAKAVA NA KA KECEGA NA VOSA SA TU VEI KOYA NA RARAMA NI BULA.
ENA YALI NA BUTOBUTO NI CILA YANI NA RARAMA NI BULA.
** JONI 1:3-5
[3] Sa cakava na ka kecega ko koya; a sa sega e dua na ka sa caka, me sega ni cakava ko koya. [4] Sa tu vei koya na bula; ia na rarama ni tamata na bula. [5] A sa cilava na butobuto na rarama; ia na butobuto sa sega ni kunea.

TINITINI
Eda vulica ena lesoni nikua ni sa bula ka tiko rawa na Vosa ni sa bera ni buli na vuravura ni sa Kalou ga na Vosa ni Kalou.
E na i tekitekivu sa tiko na Vosa, ka sa tiko vata kei na Kalou, ia na Vosa na Kalou. (Joni 1:1)

E dusia vei keda ko Joni ni sai Jisu Karisito na Vosa sa bula taumada ni sa bera ni buli na vuravura, ia sa tiko vata kei na Kalou mai na gauna sa bera ni buli kina na vuravura na Vosa.

Na Vosa oqo ko Karisito ga, sa vakatakila vei keda nai naki ni Kalou meda vakabulai kina. E dodonu kina meda vakabauti Koya ka muria na nona vosa baleta ni sa i koya ga nai vurevure ni dina kei na noda vakabulai.

Na Vosa ni Kalou sa tu ena i Vola Tabu sa mai vakararamataka na yaloda meda rawa ni vakadruka kina na kaukauwa ni butobuto. Ni sa tiko vua na bula; ia na bula koya sa mai noda vuni rarama na tamata ni da veivutuni ka vakabauti koya na Vosa.

Eda sa vulica ena vakasama oqo, na kaukauwa ni vuni ca e sega ni rawa ni vakadruka na rarama ni Vosa Bula I Karisito. Sa dodonu ga vei keda meda muria ka vakabauta na Vosa ni Kalou ni sa tu kina na bula, ni sa Kalou Ko Koya na Vosa.

Nida dau wilika nai Vola Tabu meda okata ni sa Vosa sara tikoga vei keda na Vosa ni Kalou. Ni sa Vosa mai na Kalou eda na vakila ni sa qai tekivu me rarama mai na butobuto ni lomada. Nida wilika vakavuqa na Vosa ni Kalou ena vakabauta sa na tekivu talega me na bulibuli ka vou vakalou ki yaloda na Vosa ni Kalou.

Na noda bula sa vaka ga ni dua na draiva e vakayagataka na mape se GPS me dusimaka na nona ilakolako ena dua na vanua vou e sega ni kila, eda vakayagataka tale ga na iVolatabu me dusimaka na noda vakatulewa, me tarova na noda lutu ena veika rerevaki e vunitaki tu, ka me maroroi keda tiko ena sala dodonu me vaka na loma ni Kalou..

Na Joni 1:1–5 e vakavulici keda ga ni ko Jisu na Vosa tawamudu ni Kalou, na Dauniveibuli, na ivurevure ni bula, kei na Rarama ni vuravura. Na noda ciqomi koya ena vakabauta ena kauti keda tani mai na butobuto meda rawata kina na rarama ni bula kei na bula tawa mudu vua na Turaga ko Jisu Karisito..

E. M. E. N. I
Mera kalougata na luveda Junior MYF keina noda vuvale vakaturaga.

(Ai katalau vakayalo ni matakacaca).

Tuvatuva ena macawa ni mataka
❤️❤️🙏🙏

MONITI - 29/06/2026
ULUTAGA: Ko Jisu Ga Na Wai Ni Bula
LESONI: Joni 3:1–15

TIKINA KOULA – 5:
“Sa kaya ko Jisu, E dina, e dina, au sa kaya vei iko, Kevaka sa sega ni sucu e dua e na wai kei na Yalo Tabu, ena sega ni curu rawa ki na matanitu ni Kalou.”

NA KENA I VAKAMACALA
Na veivosaki e na buto ni bogi oqo sa yavalata na noda vakasama kei na nanamaki se cava e na dodonu me na basika tarava mai. Sa yaco mai vei Jisu ko Nikotimo me mai taroga matua ki vua na sala ena rawati kina na sucu vou vakayalo. Sa qai dusia ko Jisu ni sega ni rawati ena veika mana e cakava voli e vuravura, ia kevaka ga e dua sa sucu ena wai kei na Yalo Tabu. Na wai e na vakasama oqo sa i vakatakarakara ruarua ni veivakasavasavataki kei na veivakatabui ki na bula vou e na cakacaka ni Yalo Tabu.
Oqo talega na vanua sa mai tara yavutaki kina na vakabauta ni tamata me sa sega walega ni ka ni vakasama, ia me sa dua na veisau vou e vakabasikati ni da sa Tucake vata kei na noda i Vakabula.
Sa mai rabailevu nai balebale ni Wai ni bula oqo me dusia na vakasama ni sucu vou kei na kena vakacegui na karamaca vakayalo era lako curuma na tamata. Oqori na vanua eda semati kina kei na tamata vakabauta ena gauna oqo ena kena saravi vakayago na veisau vakayalo sa basika ki na nona bula e dua e vakatokai ni sa sucu vou.
Sa mai valuta eke na Turaga na vakasama ni kena muri na mata ni lawa me sa taura vakabibi na veisau e yaco ki na bula vakayalo ni tamata.

ULUTAGA ME MASULAKI:
Me da vakasaqara ka gunu tikoga mai na wai ni bula sai Jisu.

1) KEVAKA EDA NA SEGA NI SUCU VOU VAKAYALO ENA VUKUI KARISITO EDA NA SEGA NI RAICA RAWA NA MATANITU NI KALOU.
**JONI : 3:3 - Sa vosa ko Jisu, ka kaya vua, E dina, e dina, au sa kaya vei iko, Kevaka sa sega ni sucu tale na tamata, ena sega ni raica rawa na matanitu ni Kalou.

2) NA SUCU VAKAYALO SAI KOYA NA NODA VEISAU MAI NA BULA I VALAVALA CA KINA BULA E SA VAKAVOUI ENA VUKU NI VAKAVUVULI I JISU KARISITO.
**JONI 3:6 -7
[6] Sa vakayago ko koya sa sucu e na yago; ia sa vakayalo ko koya sa sucu e na yalo. [7] Kakua ni kurabui niu sa kaya vei iko, E dodonu mo dou sucu tale.

TINITINI :
Eda vulica rawa ena lesoni oqo ni Matanitu ni Kalou e rawati ena noda sa yacova sara na sucu vou ena wai kei na Yalo Tabu.
"Kevaka e sega ni sucu e dua ena wai kei na Yalo Tabu, ena sega ni curu rawa ki na matanitu ni Kalou." E vakavulica vei keda ko Jisu ni sega ni rauta na noda sucu vakayago se noda lewena ga e dua na lotu.

E dodonu me veisautaki na noda bula ena kaukauwa ni Yalo Tabu. Na "wai" e vakaraitaka na veivutuni kei na vakasavasavataki, ia na "Yalo" e vakaraitaka na bula vou e solia na Kalou. Na sucu vou vakayalo e dolava na katuba ki na Matanitu ni Kalou.

Na sucu tale e dusia tiko ko Jisu vei Nikotimo e sega ni veisau ga ni bula e tautuba, ia e veisautaka na lomada, noda vakasama, kei na noda i valavala. Ena cakacaka ni Yalo Tabu eda vulica kina meda lomana na Kalou, talairawarawa vua, ka bula ena yalododonu. O koya e sucu tale e sa tekivu bula ena bula vou ka vakaraitaka na vua ni Yalo Tabu ena nona bula e veisiga.

Na sucu tale e sega ni ka ni digidigi vua e dua na Lewe ni lotu Vakarisito, ia sa ka bibi me rawa ni curu kina e dua kina Matanitu ni Kalou. E sureti keda o Jisu meda ciqoma na bula vou e solia na Yalo Tabu.

Na sucu vou ena Yalo Tabu keina Wai ena noda bula na tamata sa cakacaka ga nei Jisu Karisito, sa dodonu ga meda veivutuni mai na noda I valavala ca ka ciqomi Jisu Karisito me noda Turaga ka noda I vakabula.

Na uto ni vskasama oqo sai koya na curu ki na matanitu ni Kalou e sega ni yavutaki ena noda sucu vakayago, noda itutu, noda cakacaka, ka eda rawata se rogo kinal, ia ena noda sucu vou ga ena wai kei na Yalo Tabu ena vuku ni noda veivutuni keina noda vakabauti Jisu Karisito

E. M. E. N. I
Me kalougata saka na noda vuvale vakaturaga.

(Ai katalau vakayalo ni matakacaca)