Linha di tempu

Karapatidu na parapetu di distinu,
Ndixi, ndjongotu riba-l pedra nha xintidu,
Ta matuta vida di homi,
Ki bira sima di manel mangradu, ku korbu ku tudu!
Txon dja ngetadu,
Rubera dja dadu kosta,
Mininus dja ka santa prasa,
Netus riba-l rua,
Kasa só ku nbatxi, ku boka ratu!

Ki dja krê ka podi,
Ki dja podi, sta nguniadu,
Pamô ordi burdona ka sata rena más,
Kem ki ta ramedia dja larga dja kori!

Koitadu nha txentxa, ki minis fasi fuku fuku,
Kamba kutelu,
Y Djan djan na kutelu, ka sata pasal!

Xintadu es ta spera txoru maguadu,
Pa bem pol 3 dia na arka,
Na djangada di aitu valor,
Y iternizel ku mármore pretu na simitéri,
Ku tiston ki era razon di si solidon!

Fidju-l parida,
Ki pari sete, kaba ku zeru,
Nem kriatura pa botal agu na boka.

Mundu da ki pensa,
Speransa bira na mar,
Ki sta sķravizadu, pa dez eskudu,
Agu na labada kobi ta seka,
Pamodi homi dja skese de terra!