Biken Chege

ভাতজরা ফুলুর গজরবো যুনি তরে দোং, তরে;
গুজিয় লবে কি তুই, আহ্'ত তানি লবে কি তুই?
মর তিন কুরি বঝরর কোচপানা যুনি, যুনি তরে দোং
বুরোহ্ কোয়নে মু ফিরেয় নিবেনি তুই, গুজিবে কি তুই?

জীংকানির পধত কবিতার সমারে কধা কধে কধে ;
লাঙরমেয়্যা ন পেয়্যা এক্কো তিনকুরি বঝরর লাঙ,
গল্প, প্রবন্ধ, উপন্যাসর সমারে দিন গোঙাদে গোঙাদে
লাঙমেয়্যার জালত ন পোচ্ছে গাবুর বুরোহ্ মুই!

কধে, তুও যুনি তরে মর তিনকুরির ভাতজরা দোং;
গুজিয় লবে কি তুই মর তিনকুরির গাবুর বুরোরে?
তর নোনেয় কধা, লুলং চেইথানা মরে গাবুর গরে-
মর আয়োজ জাগে এককুরি বঝরর গাবুর অহ্'বের!

গাবুরী, তর আঝিবো, ত' রবো বুঘত সেল মারিল;
তর কধার ফস্স মরে পুনংচান সাজে জাগেল।
মুই ইক্কে তরে নিনে সবন দেঘং দোল এক্কান জুমর
কধে এ বয়ঝত কি সবন দেঘি ন পারে, সবন কি দুচ?

কধে, তরে যুনি গোজাং তিনকুরির ভাতজরাফুল মর;
সে ফুলুন কি ত মনর সুন্ধুগত লোই পারিবাক জাগা তর?
মর তিনকুরি বঝরর দমি যেয়্যা কোচপানা কি লভে?
তর আধর ট্যাটুবো কি মর আধত আগেয় দি যেবে?

কধে গাবুরী, এ বয়ঝত কি কোচপেই ন পারে কাররে;
কোচপানাত কি বয়জর সুধোম আঘে এ মেদনীর বুঘত?
কোই পারচ, ইরুক মুই লেঘা লেঘি ন জানং, ন পারং-
মনান বানা তরে বাচ্ছে থাই তরে, তর কধা আঝিরে!

মর আর' গাবুর অহ্'বের তিরোজ জাগে মন কোনত;
দ্বিবে চোঘত সাজে এক্কান দিয়েন আঝা আ সবন,
হালিক মুই দ তিনকুরি বজস্যা এক্কো বুরোহ্ গাবুর-
ম' মনর কোচপানা কি কন' গাবুর তিরোজী বুঝিবাক?

তিনকুরির ভাতজরাফুল

Biken Chege

৩ চোত ২৭১৩ সাক্যমাব্দ
৩.৪ ২০২৩
জুমারাম, চাদিগাঙ

আরুক: নেট

রভেদ
তিনকুরি- ৬০

ভালকভিলোন কার'লোয় কধা ন অহ্'য়, কার'লোয় লাঘতপাপি ন অহ্'য়। কধা ন অহ্'লে লাঘতপাপি ন অহ্'লে কি সদরউনও সাদাঙা অহ্'ন?

বসন্ত এচ্ছে ভিলে পিনোন ইরি শাড়ী কেত্তে পিনানাহ্;
পিনোন পিনি বসন্তরে কেত্তে পাত্তুরুতুর ন' জানানা?
বসন্ত এচ্ছে ভিলে কি জাদর পোঝাক ইরি দিবে তুই-
বসন্ত এচ্ছে ভিলে কি জাদর পোঝাগরে গরিবে থুই!

তরে কঙর নাগরী, তরে; বসন্ত বানা শাড়ীলোই নই
বসন্তরে লবিয়ত গত্তে শাড়ী ন লাগে, বসন্ত বানা শাড়ীর নই।
পিত্থিমীর যিধু যিধু বসন্ত এচ্ছে খুজির বান তুলি তুলি-
সে বন্দাউন শাড়ী ন পিনন, পিন্যন জাদর পিনোন-খাদি।

কধে নাগরী, সালেন তত্তুন কেত্তে পিনাহ্ পরিবো শাড়ী?
শাড়ী পিনেলি কি কনজনে অয়পারন রাজাঘরর রাণী?
কধে নাগরী কধে, কেত্তে তুই ছলং বদলেবার গরজী-
এ বেসুঞ্জুক দিনত কেত্তে নিজরে সচ ইরি দোর, কেত্তে?

নাগরী, ও নাগরী, বসন্ত পালাদে শাড়ী ন লাগে পিনদে;
বসন্ত পালাদে কেয়্যাত, আহ্'দত মেহেদী গুলা ন পরে,
তুই পিনোন-খাদি পিনি, মিন্তিপাদা গুলি সাজি পারচ-
এ সাজানাত জাদর চিন, জাদর সুধোম ফুদি উদিবো!

নাগরী, বসন্ত বানা শাড়ী পিন্যা জাদত্তে নই, তারাত্তে নই;
এ বসন্ত মেদিনীর বেক জাদত্তে, এ বসন্ত বেক বন্দাত্তে।
তত্তুন শাড়ী পিনাহ্ ন পরিবো বসন্তরে লবিয়ত গরদে-
ন পরিবো মেহেদীরে আহ্'দত, থেঙত গুলানা, ন পরিবো।

নাগরী দাঙর অহ্'নেয় কেত্তে বেজাদর সুধোমত মঝর;
বেজাদর ভাঝে, সুধোমে মিঝি কেত্তে জাদরে মারর, কেত্তে!
নাগরী, তুই কি ন পারচ এ দিনত, এ মাধানত জেইউধি-
জাদর সুধোম, জাদর কধায় মাদি মাদি দুন্নিবেরেবার!

নাগরী, তরে মুই ধারাচ গরং এ বেসুঞ্জুক দিনত কায় পেবার;
এ বেসুঞ্জুক দিনত কধা ধরাধচ্ছি জাদর কাম গরি যেবার,
হালিক, ইরুক তুই চিগোনকালর নাগরী নই, মন বদল্যে-
তুই ইরুক অহ্'মা জাদর সুধোমত মঝদে সচ্চরম পাচ, সচ্চরম!

নাগরী, তরে মুই জাদ, ভাচ বাজনির লারেয়র সমার চাঙ;
এ বন্দালাং নেয়্যা বন্দাত্তুন জাদ, ভাঝর সরান ছিনিবার চাঙ।
নাগরী, তুই যুনি এ ম'কায় থেলে, মেদিনীরে মুই গুদি ন রাগেম-
যেধকদিন জাদ, ভাঝর সরান ন অহ্'য় সেধকদিন লরি তাদি যেম!

নাগরী, তুই কি সুনর?
Biken Chege

২২০২২০২২
জুমারাম, চাদিগাঙ

[ কবিতাবো মাদেয় যারা শাড়ী পিনন, অহ্'লে তারা বেসুঞ্জুক পেবাক মনানত। মাত্তর জাদর এ নিরেতিত্যা দিনত, আমনে মাদি ন থে পারে। মাদা পরে, ঘুম্যবন্দারে জাগেবার।]

কোজ্জালত থোয়্যা নাকসাফুলুন চিধে অহ্'লাক, তরে দেনা ন অহ্'ল
মনানত থোয়্যা দ্বিয়েন কধা কুধু লুকদিল', তরে কনাহ্ ন অহ্'ল
বারিঝে ঝরি গেল, ফাউন এই থেগেল, ফুদিলাক আর নাকসাফুল-
মাত্তর তরে, তর চুলঝুধোত গুজেয়দি ন অহ্'ল, ন অহ্'ল কনখেব!

মরও ফিরানা ন অহ্'ল কধাদেনার ধগেধগে, কনখেব আদামত
জুনোপহরত বজানাহ্ ন অহ্'ল কায়কুয় উদোনত, কায়কুয় দ্বিজনর
মন কধার লবিয়ত গরাহ্'গরিহ্ ন অহ্'ল, কনখেব এ জীংকানিত
বানা দ্বিবে চোঘত, মনগুমোরত, কাগজর পাদাত সমরি গেল!

তুইও ন বাচ্চেলে মরে, তুইও কধা রাঘেই ন পারিলে এ খেব, তুই
মুইও ফিরি ন পারিলুং ত সিধু, ইরি ন পারিলুং জাদ বাজোনির আত্থের
হালিক ত কধা ইধোত উধে জুনোপহরর রেত্তুন লামি এলে, লামি
তরে নিনে কধা কবার আয়োজ জাগে নিগুচনিগুচ গরিনে!

কোজ্জালত থোয়্যা নাকসাফুল্যর বজও কম ন অহ্'ল, কম;
তর দাঙর পুঅবোর বজও দ কম ন পুরেল, দাঙর উয়ে তে।
মাত্তর কোজ্জালর নাকসাফুল্য ইরুক তুম্বাজ ন ছিদে বোয়ের মাত্তলত-
কধে, যুনি আর দেঘা অহ্'য় তর আ মর সক্কে কি কবেহ্ মরে?

মর দ আর আদামত, ঘরত ফিরানা ন অহ্'ব, মর ফিরানা অহ্'ধ নই
বাঙামাচ্চে আত্থেরবোঅ ইরানা ন অহ্'ব, লারেয়অ অহ্'ধ নই ইরানা
এ মাদির গরজে, জাদ বন্দার গরজে মত্তুন তরেয় যা পরিবো
লারেয়র জীংকানীন ন'গানর পাঙে বেই যা পরিবো গোদা উমরান……!

কোজ্জালর নাকসাফুল

Biken Chege

২২০২২০২২
জুমারাম, চাদিগাঙ

তুঙোবী, একদিন এ মেদিনীর বুগত কন এক হেনত
তর মর দেঘা অহ্'ব, সবন সবন খারা থুম অহ্'লে
সক্কে দ্বিজনে বরগাঙর ধাঘত কায়কুয় বঝি মাদিবং-
ধুপঝাক বগা, পানিকুরির উরনি চেই পাকাতিত মিজিবং।

তুঙোবী, কন একদিন বেলদুবোনিত দ্বিজনে এগত্তর অহ্'বং
সাজন্যা আভা যক্কে লামংলামং বাচ্ছে থেব
সক্কে তুই মরে গুমোরর বেক কধা হুলি মেলি লবিয়ত গরিচ
মুই সক্কে তর কধালবিয়ত পেইপেই পাকাতিত মিঝিম।

তুঙোবী, কোয় পারচ এ লারেয় উজু নই, এ লারেয় উচ্চো লয়
অহ্'য় তুঙোবী, লারেয় কাদাবেজেয়্যা এক্কান বাম
যিওত লুও ঝরে, পরান ছিনে, রোক্কে, আদুর ওই পরে-
হালিক তুং, এ লারেয় সরানর, সবনর সরান!

তুঙোবী, এ বরগাঙর পানিয়ান একদিন সুঘেয় যেব;
রাজঘরান ভাজাদি উদিবো অবিরিকবারাক গরি
আহ্'ভিলেজে তম্বার বারিঝে লামিবো, বারিঝে-
মাত্তর এ লারেয় থুম অহ্'ধ নই, থুম নেই লারেয়র।

তুঙোবী, তলোই মর একদিন দেঘা অহ্'ব সবন খারার থুমে
সক্কে বনরূপো বাজারত বেরেবং সংখুচ ফেলেয়
বিহারত যেই তথাগতরে গোজেবং আমনরে -
কধে সক্কে কি তুই মর সমার থেবে, তুঙোবী?

তুঙোবী, এ লারেয় এ সবন খারার লারেয় একদিন থুম অহ্'ব
বন্দালাংনেয়্যাউন একদিন উধি যেবাক পধেপধে
চিরোহিত্তে তিরোজ্যা জুমবলার রেং সুনিবে
কিজেক, জোগার সুনিবে সক্কে, যক্কে মুই ফিরিম।

তুঙোবী, এ সবন খারার লারেয় থুম অহ্'লে, এ লারেয়
সক্কে দ্বিজনে নিচিদে কধা কবং বরগাঙর ধাঘত বঝি
জুনোপহরর রেদত, আমা ঘরর ঘাধত, ন অলে তমার
জুনিপুগর সমারে, দুরর তারার সমারে বনজুরিবং সক্কে, বন!

তুঙোবী, তুই সুনর?

Biken Chege
১৯/ ২/২০২২
জুমারাম, চাদিবাম