Lina Cakes

#رسائلكم

البنات لقيت راجلي كيخونّي مع وحدة مزوجة وعندها ثلاث بنات. دابا عندو عام وهو معاها، وهي خدامة عندو فالمشروع ديالو. مني عرفت الحقيقة، قالي غادي يطلقها من راجلها باش يتزوج بيها. عندي المساجات اللي بينهم وكلشي بالدليل، وهي ما بغاتش تعترف وكتحاول تبان ضحية. دابا أنا في مشاكل معاه وولادي صغار مساكين، وفكرت نطلق منو. شنو رأيكم فحالتي؟ شنو ندير؟

السلام عليكم، ممكن ناخد رأيكم فمشكلتي؟ هادي أول مرة نكتب هنا. أنا عندي 24 عام، متزوجة من جوج سنين ونص، ودابا عندي وليد عندو 3 شهور. دابا رافعة دعوى ديال الخلع باش نتطلق، حيث راجلي ضحك عليا. صبرت معاه حتى شرا الدار، ومن بعد ما شراها، اكتشفت أنه كتبها باسم مو، حيث كيسمع كلامها فكلشي. مع أنه كان حارمنا من الماكلة والشرب باش نوفرو فلوس الدار.

المهم، طلبت الطلاق ورجعت لدار بّا، وهو ما سولش فيا نهائياً، ولا حتى فابنو. أنا ملي خليت الدار كان بسبب أنه ضربني وانا مزال والدة، حيث قلت ليه علاش كتكتب الدار باسم مو؟ واش ماشي حرام عليك؟ راك عندك ولد، واش انا غلطانة؟ لأنه من بعد عمر طويل ديال مو، الدار غادي تولي ورث ليه ولخوتو، وماشي شي حد غادي يخلي حقو فديك الساعة. يعني أنا ولا ولدي غادي نبقاو قاعدين عندهم. واش فاهمني؟

المهم، من بعد ما طلبت الطلاق، بّاه كلمني وقال لي: "إيلا بغيتي الطلاق، خصك تتنازلي على جميع حقوقك، وبالنسبة لولدك، ما غاديش نخلصو ليه غير 1000 درهم." فالأول وافقت، ولكن من بعد حسيت بلي كيبغيو يذلوني، ومن بعد رجعت فقراري وقلت ليهم ما غاديش نتنازل، وغادي ندير الخلع ونطالب بالقايمة ديالي.

بغيت نعرف واش أنا غلطانة؟ وإيلا كنت غلطانة، كان خاصني ندير شنو؟ سمحوا ليا إلا طولت.