timoni.al

💥A DUHET SPAK TË HAPË HETIM PËR TENDERAT E BASHKISË HIMARË?

Nëse ka një institucion që duhet të shpjegojë para qytetarëve se si po shpenzohen milionat e taksave të tyre, ai është Bashkia Himarë. Dhe kur një pas një dalin tendera me vlera të mëdha, me konkurrencë të kufizuar dhe me oferta që afrohen pothuajse në mënyrë perfekte me fondin limit, dyshimet janë të pashmangshme.

Rasti më i fundit është tenderi “Projekte zbatimi, shërbim projektimi”, me një fond limit prej mbi 20.8 milionë lekësh pa TVSH. Në garë u paraqitën vetëm dy operatorë ekonomikë, ndërsa fituesi u shpall me një ofertë prej 19.48 milionë lekësh, shumë pranë fondit limit të përcaktuar nga autoriteti kontraktor.

Kjo ngre disa pyetje themelore. Pse një tender me vlerë kaq të lartë nuk arriti të tërheqë më shumë konkurrentë? A ishin kriteret të hartuara në mënyrë që të garantonin konkurrencë reale? A është bërë një analizë e tregut përpara se të përcaktohej fondi limit? Dhe mbi të gjitha, a ka marrë Bashkia Himarë vlerën më të mirë të mundshme për paratë e qytetarëve?

Kur diferenca mes ofertës fituese dhe fondit limit është minimale, ndërsa numri i konkurrentëve mbetet i ulët, lind nevoja për verifikim të thelluar. Jo sepse kjo provon automatikisht shkelje, por sepse është pikërisht detyra e institucioneve të kontrollit të sigurohen që fondet publike nuk po përdoren në mënyrë të padrejtë ose të favorizuar.

SPAK nuk duhet të presë vetëm denoncime penale. Kur krijohet një seri procedurash që ngjallin dyshime mbi konkurrencën, transparencën dhe eficiencën e përdorimit të parave publike, është në interes të publikut që të kryhen verifikime të plota mbi mënyrën e administrimit të tenderave.

Qytetarët e Himarës kanë të drejtë të dinë nëse miliona lekë po përdoren për nevoja reale të komunitetit apo nëse pas kontratave të majme fshihen mekanizma që kufizojnë konkurrencën dhe favorizojnë interesa të caktuara.

Në fund të fundit, hetimi nuk është dënim. Hetimi është transparencë. Dhe nëse gjithçka është bërë sipas ligjit, atëherë një verifikim nga SPAK do të shërbente për të larguar çdo dyshim. Por nëse pas këtyre tenderave fshihen shkelje, atëherë qytetarët meritojnë të dinë të vërtetën dhe përgjegjësit duhet të mbajnë përgjegjësi.

Milionat e buxhetit publik nuk janë pronë e asnjë kryetari bashkie. Ato janë para të qytetarëve dhe duhet të trajtohen me llogaridhënie të plotë.

💥Zvërnec South Adriatic Development ndërpret kontratën me kompaninë e sigurisë pas incidentit: Nuk kishin asnjë autorizim nga ne, kërkojmë falje

Pasi kemi shqyrtuar me përgjegjësi të plotë materialet e bëra publike mbi sjelljen e pajustifikueshme të shoqërisë së sigurisë, kompania "Zvërnec South Adriatic Development" njofton shtypin dhe opinionin publik si më poshtë:
Për të garantuar sigurinë e zonës zhvillimore, që është tërësisht pronë private, ishte kontraktuar një kompani sigurie e pajisur me lejet dhe licencat përkatëse nga institucionet shtetërore dhe me përvojë në këtë fushë.
Por ekzaminimi i materialeve e bën absolutisht të papranueshme vazhdimin e marrëdhënies kontraktuale me këtë shoqëri. Në asnjë moment, kompania e kontraktuar e sigurisë nuk ka pasur instruksione nga ana jonë për të vepruar në kundërshtim me autorizimet ligjore dhe në cenim të të drejtave të garantuara për qytetarët shqiptarë.
Ndërhyrja ndaj një qytetari që ishte në të drejtën e tij të plotë për të protestuar jashtë kufirit të pronës, dhe tërheqja e tij brenda saj për të ushtruar forcë, nuk është vetëm e papranueshme moralisht, por edhe e dënueshme penalisht. Për këtë arsye kemi ndërprerë me efekt të menjëhershëm marrëdhënien kontraktuale me shoqërinë e sigurisë.
Kërkojmë ndjesë për këtë incident të panevojshëm dhe u bëjmë thirrje organeve kompetente të kryejnë një hetim të plotë e të paanshëm të ngjarjes dhe të ndëshkojnë sipas ligjit personat përgjegjës. "Zvërnec South Adriatic Development" qëndron në dispozicion të plotë ndaj autoriteteve dhe të gjitha palëve të tjera të interesuara, me gatishmëri dhe transparencë të plotë.
Ritheksojmë se marrëdhënia me komunitetin është thelbësore për investitorët dhe mbetemi të angazhuar të bashkëpunojmë me të gjithë banorët e zonës. Në javët në vijim do të shtojmë përpjekjet tona për një komunikim më thelbësor me komunitetin e respektuar të zonës.
Po ashtu shprehim keqardhjen që episodi i shëmtuar i djeshëm po shfrytëzohet për të qarkulluar në rrjetet sociale pamje tërësisht të fabrikuara të projektit, me qëllim nxitjen e idesë së gabuar se zhvillimi do të shkatërrojë natyrën.
Vlera ndërkombëtare e projektit qëndron pikërisht në përkushtimin maksimal për të harmonizuar projektin me natyrën, sipas standardeve më të larta të aplikuara ndonjëherë, në mbrojtje të ekosistemeve të veçanta të zonës, si vlerë e padiskutueshme e trashëgimisë natyrore të Shqipërisë.
Projekti final do t'i prezantohet në kohën e duhur publikut si dëshmi përtej çdo dyshimi e një shembulli të shkëlqyer të harmonisë me natyrën.